41
Orasaun husu Nai Maromak atu kura moras
Salmu David nian, ba dirijenti koru.
1 Ema nebee konsidera ema kiik, sira hetan ksolok;
bainhira sira iha susar laran, NAI Maromak salva sira.
2 NAI foo mahon ba sira hodi kuidadu sira;
sira moris haksolok iha rai nee.
Nia la husik sira monu iha sira nia inimigu nia liman laran.
3 Bainhira sira moras iha sira nia toba fatin, NAI tau matan ba sira
hodi foo fali isin diak ba sira.
4 Uluk hau harohan nunee: “NAI Maromak, hanoin hau ba!
Hau halo sala kontra Ita Boot; kura hau ba.”
5 Hau nia inimigu sira hatete aat hau dehan,
“Bainhira mak nia mate, atu nia naran la temi tan?”
6 Kuandu sira ida mai haree hau,
sira finji koalia diak mai hau,
maibee sira nia laran hakarak buka hatene hau nia susar,
depois sira sai baa konta iha fat-fatin.
7 Ema nebee odi hau bis-bisu ba malu kona ba hau;
sira hanoin buat aat mai hau dehan,
8 “Moras aat kona ona nia;
atu hamriik tan husi nia toba fatin mos la bele ona.”
9 Maski hau nia belun diak,
hau konfia loos nia,
nia tuur haan hamutuk ho hau,
nia sai fali hau nia inimigu.
10 NAI Maromak, hanoin hau ba;
foti sae hau, nunee hau bele selu fali sira.
11 Hau hatene katak Ita Boot nia laran haksolok ho hau,
tanba hau nia inimigu la manaan hau.
12 Ita Boot tulun hau tanba hau nia laran moos;
Ita Boot hatuur hau iha Ita Boot nia oin too tinan ba tinan.
13 Hahii NAI, Israel nia Maromak,
nafatin ba nafatin.
Amen, amen.