42
Hamrook buka Nai Maromak
Salmu husi Korá nia oan para hanorin ema. Ba dirijenti koru.
1 Hanesan rusa hamrook teb-tebes atu hemu bee mota nian,
nunee mos hau hamrook teb-tebes ba Ita Boot, hau nia Maromak.
2 Hau hamrook ba Ita Boot, Maromak Moris.
Bainhira loos mak hau baa too iha Ita Boot nia oin?
3 Loron-kalan matan been mak sai fali hau nia hahaan,
tanba loron tomak ema hatete mai hau dehan,
“O nia Maromak iha nebee?”
4 Hau nia laran susar;
hau hanoin hetan
uluk hau baa iha Maromak nia uma,
iha Kbiit Nain nia mahon.
Hau hamutuk ho ema lubun boot
haklalak haksolok hahii Maromak.
5 Hau husu ba hau nia aan,
“Tansaa mak o tristi?
Tansaa mak o nia laran la hakmatek?”
Laran metin ba Maromak ba,
tanba hau sei hahii fila fali Nia,
hau nia Salvador ho hau nia Maromak.
6 Hau nia laran tristi teb-tebes;
tanba nee, husi rai Jordaun nian nee,
husi foho Hermon nia tutun, husi foho Mizar,
hau hanoin Ita Boot.
7 Ita Boot nia mota tuun ho lian makaas
too bee boot mos tarutu simu malu iha fat-fatin.
Ita Boot nia laloran nadodon mai, halo mout tiha hau.
8 Iha loron, NAI Maromak hatudu Nia domin rohan-laek;
iha kalan, hau hananu ba Nia,
hanesan orasaun ida ba Maromak, hau nia moris huun.
9 Maromak mak fatuk kuak boot nebee hau subar iha laran.
Hau hatete ba Nia,
“Tansaa mak Ita Boot haluha hau?
Tansaa mak hau nia inimigu hanehan hau
too hau moris halerik nunee?”
10 Hau nia inimigu hamoe hau,
halo hau nia ruin sira rahun tiha.
Loron tomak sira hatete mai hau dehan,
“O nia Maromak iha nebee?”
11 Hau husu ba hau nia aan,
“Tansaa mak o tristi?
Tansaa mak o nia laran la hakmatek?”
Laran metin ba Maromak ba,
tanba hau sei hahii fila fali Nia,
hau nia Salvador ho hau nia Maromak.