43
Orasaun halerik iha ema nia rain
1 Hau nia Maromak, tesi hau nia lia ba hodi deklara katak hau la sala;
defende hau kontra nasaun nebee la fiar Ita Boot;
salva hau husi ema sira nebee laran aat ho bosok-teen.
2 Tanba Ita Boot mak Maromak, hau nia subar fatin.
Tansaa mak Ita Boot soe hela hau?
Tansaa mak hau nia inimigu hanehan hau
too hau moris halerik nunee?
3 Haruka Ita Boot nia naroman ho Ita Boot nia lia loos
hodi gia hau;
husik buat sira nee lori hau ba iha Ita Boot nia foho santu,
ba iha fatin nebee Ita Boot hela ba.
4 Too iha nebaa, hau sei baa iha Maromak nia altar oin;
hau sei baa iha Maromak, hau nia ksolok nia huun.
Maromak, hau nia Maromak,
hau sei toka viola hodi hahii Ita Boot.
5 Hau husu ba hau nia aan,
“Tansaa mak o tristi?
Tansaa mak o nia laran la hakmatek?”
Laran metin ba Maromak ba,
tanba hau sei hahii fila fali Nia,
hau nia Salvador ho hau nia Maromak.