44
Orasaun bainhira inimigu hanehan
Salmu husi Korá nia oan para hanorin ema. Ba dirijenti koru.
1 Maromak, ami rona tiha ona ho ami nia tilun rasik;
ami nia bei-ala sira konta tiha ona mai ami
buat nebee Ita Boot halo iha sira nia tempu,
iha tempu uluk nian.
2 Ho Ita Boot nia liman, Ita Boot duni sai tiha nasaun jentiu sira
hodi tau fali ami nia bei-ala sira;
Ita Boot halo rahun tiha povu jentiu sira,
no halo ami nia bei-ala sira sai buras.
3 Sira laos uza sira nia surik mak hadau rai nee;
sira laos uza sira nia forsa rasik mak manaan,
maibee sira manaan tanba Ita Boot nia liman loos ho Ita Boot nia forsa,
ho mos Ita Boot nia oin nabilan,
tanba Ita Boot nia laran kontenti ho sira.
4 Ita Boot mak hau nia Liurai ho hau nia Maromak;
Ita Boot deklara katak Jacó nia jerasaun sei manaan.
5 Ho Ita Boot nia kbiit ami duni sai ami nia inimigu sira;
ho Ita Boot nia naran ami sama ami nia funu baluk sira.
6 Hau la tau hau nia fiar iha hau nia rama;
hau nia surik la halo hau manaan.
7 Maibee Ita Boot mak halo ami manaan ami nia inimigu sira;
Ita Boot halo moe ami nia funu baluk sira.
8 Iha loron tomak ami konta Ita Boot nia diak;
ami sei hahii Ita Boot nia naran nafatin ba nafatin.
9 Maibee agora Ita Boot fila kotuk hodi hatuun fali ami;
Ita Boot la hamutuk tiha ona ho ami nia militar sira.
10 Ita Boot halo ami hakiduk iha ami nia inimigu sira nia oin;
ami nia funu baluk sira hadau tiha ami nia sasaan.
11 Ita Boot husik ema oho ami hanesan fali ema oho bibi;
sira halo ami namkari iha nasaun jentiu sira.
12 Ita Boot faan Ita Boot nia povu ho folin baratu deit,
la interese atu husu folin diak nian.
13 Ita Boot halo ami moe iha vizinhu sira nia oin;
ema nebee haleu ami hatete aat ami no hatuun ami.
14 Ita Boot halo ami sai naran aat iha nasaun jentiu sira nia leet;
estranjeiru sira doko ulun ba ami.
15 Loron-kalan hau senti hau nia naran sai foer tiha ona;
hau moe boot,
16 tanba rona ema hatuun ami ho tarata ami,
no haree inimigu sira ho ema nebee odi ami.
17 Buat hirak nee hotu mai iha ami nia leten,
afinal ami la haluha Ita Boot;
ami la kontra Ita Boot nia lei ho promesa.
18 Ami la fila kotuk ba Ita Boot;
ami la lao sees husi Ita Boot nia dalan.
19 Maibee Ita Boot harahun tiha ami iha animal fuik nia hela fatin;
Ita Boot falun ami ho nakukun boot.
20 Se karik ami haluha tiha ami nia Maromak nia naran
ka tane liman fali ba maromak seluk,
21 Ita Boot hatene hela,
tanba Ita Boot hatene hotu ema nia segredu iha laran.
22 Loron-kalan ema buka dalan atu oho ami tanba ami tuir Ita Boot.
Sira haree ami hanesan bibi malae nebee mak sira atu oho.
23 Nai Maromak, hadeer ona ba! Nusaa mak Ita Boot toba dukur?
Hamriik ba! Keta husik hela ami tinan ba tinan.
24 Tansaa mak Ita Boot subar Ita Boot nia oin?
Tansaa Ita Boot haluha ami nia terus ho susar?
25 Ami monu tuun tiha ona ba iha rai rahun;
ami monu taka rabat iha rai.
26 Hamriik hodi tulun ami ba;
salva ami tanba Ita Boot nia domin rohan-laek.