45
Kantiku ba liurai nia festa kazamentu
Salmu husi Korá nia oan, para hanorin ema. Kantiku kazamentu nian, tuir muzika “Ai funan liriu.” Ba dirijenti koru.
1 Hau nia laran nakonu ho liafuan murak;
hau nia ibun hanesan matenek nain nia lapizeira;
hau hakarak oferese hau nia poezia ba liurai.
2 O mak bonitu liu ema hotu-hotu;
liafuan mesak furak sai husi o nia ibun;
Maromak foo bensaun ba o nafatin ba nafatin.
3 Aswain, sikat o nia surik iha o nia kanotak;
hatudu sai o nia kbiit ho o nia furak!
4 Uza o nia kbiit nee lao ba oin too manaan
hodi defende lia loos, hahalok haraik aan ho justisa;
uza o nia forsa hodi halo buat boot.
5 Liurai, o nia rama oan kroat,
tama borus o nia inimigu sira nia fuan;
nasaun jentiu sira monu iha o nia ain okos.
6 Nai, o sei ukun tinan ba tinan;
o sempre ukun o nia reinu ho lo-loos.
7 O haksolok bainhira ema halo buat diak;
o hakribi hahalok aat.
Tanba nee, Nai o nia Maromak foti o aas liu o nia maluk sira;
Nia kose mina ba o nia ulun hodi halo o nia laran haksolok.
8 O nia ropa hotu-hotu tau ai morin ho mina morin diak nian ho ai kameli;
o nia palasiu enfeita ho elefante nia nehan;
muzika viola nian halo kontenti o nia laran.
9 Feto nebee hela iha o nia palasiu, balu raan liurai;
liurai nia noiva hatais osan mean husi rai Ofir hodi tuur iha o nia sorin loos.
10 Liurai feto, rona mai, hanoin di-diak hodi see tilun;
haluha tiha o nia o nia povu ho o nia aman nia uma laran.
11 O nia furak halo liurai gosta teb-tebes o;
nia mak o nia nai; hakruuk ba nia.
12 Povu husi sidade Tiru sei mai foo prezenti;
ema riku sira iha povu nia leet sei buka manaan o nia laran.
13 Liurai feto nee iha nia kuartu laran,
nia bonita teb-tebes.
Nia vestidu naruk enfeita ho osan mean;
14 nia hena kor oi-oin deit.
Ema lori nia ba iha liurai nia oin;
nia maluk feto raan sira akompanha nia husi kotuk.
15 Ho kontenti ho haksolok,
sira hakat dadauk mai tama iha liurai nia palasiu.
16 Liurai, o sei iha oan mane hodi tuur iha o nia kadeira ukun;
o sei foti sira hodi ukun rai tomak.
17 Hau sei foti aas o nia naran husi jerasaun ba jerasaun,
nunee nasaun hotu-hotu sei gaba o tinan ba tinan.