46
Nai Maromak Aswain hamutuk ho ita
Kantiku ida husi jerasaun Korá nian, tuir muzika Alamot. Ba dirijenti koru.
1 Maromak mak foo mahon mai ita no foo forsa mai ita;
Nia sempre tulun ita iha susar laran.
2 Tanba nee ita sei la tauk,
maski rai nakdoko
too foho naksobu tuun ba tasi klaran.
3 Maski tasi siak nafurin sae
too laloran baku makaas halo foho nakdoko,
ita sei la nakdedar.
4 Iha mota ida halo haksolok povu iha Maromak nia sidade,
Maromak Aas Liu hela iha fatin santu nee.
5 Maromak iha fatin nee, nunee sidade nee sei la monu.
Dadeer-saan rai huun mutin, Maromak sei tulun sidade nee.
6 Nasaun jentiu sira rungu-ranga, liurai sira nakdoko;
Maromak nia lian tarutu halo rai nabeen tiha.
7 NAI Maromak Aswain hamutuk ho ita;
Jacó nia Maromak mak ita nia abrigu.
8 Mai hodi haree saida mak NAI Maromak halo tiha ona.
Haree ba! Nia hatudu buat boot iha mundu.
9 Nia hapara funu husi rai ulun too rai ikun iha mundu tomak.
Nia silu tohar tiha rama no halo rahun tiha diman.
Ai belar nebee ema uza hodi defende aan, Nia sunu tiha.
10 Maromak dehan, “Hakmatek ba, no rekonhese katak Hau mak Maromak.
Ema iha nasaun hotu-hotu haboot Hau nia naran;
ema iha mundu tomak foti aas Hau nia naran.”
11 NAI Maromak Aswain hamutuk ho ita;
Jacó nia Maromak mak ita nia abrigu.