47
Nai Maromak Liurai boot
Salmu husi Korá nia oan, ba dirijenti koru.
1 Povu husi nasaun hotu-hotu, basa liman ba;
haklalak hahii Maromak ho haksolok.
2 Tanba NAI Maromak Kbiit Nain nee makaas;
Nia mak Liurai boot hodi ukun mundu tomak.
3 Nia halo nasaun jentiu sira hakruuk mai ita;
Nia halo povu jentiu sira monu iha ita nia ain okos.
4 Nia hili rai nee hodi foo ba ita povu Israel;
Nia hadomi teb-tebes ita, ita mos kontenti ho rai nee.
5 NAI Maromak sae dadauk baa tuur iha Nia kadeira ukun, povu haklalak;
NAI hakat sae, korneta lian akompanha Nia.
6 Hananu hahii Maromak, hananu hahii ba Nia;
hananu hahii ba ita nia Liurai, hananu hahii ba,
7 tanba Maromak nee mundu tomak nia Liurai;
hananu salmu hodi hahii Nia ba.
8 Maromak ukun nasaun hotu-hotu;
Maromak tuur iha Nia kadeira ukun santu nian.
9 Nai ulun nasaun sira nee halibur hamutuk
ho povu nebee Abraão nia Maromak hili nanis ona,
tanba liurai hotu-hotu iha mundu nee Maromak nian;
Nia mak boot liu hotu-hotu.