48
Jerusalém Nai Maromak nia sidade
Salmu husi Korá nia oan. Kantiku ida.
1 NAI Maromak nee boot;
ita nia Maromak merese duni atu ita hahii
iha Nia sidade,
iha Nia foho santu.
2 Foho nee aas ho furak,
halo haksolok mundu tomak.
Nee mak foho Siaun, iha liu parte norte,
Liurai boot nia sidade.
3 Iha sidade nia moru laran,
Maromak hatudu ona katak Nia rasik mak defende sidade nee.
4 Liurai nasaun sel-seluk halibur sira nia tropas;
sira hamutuk avansa ba oin.
5 Bainhira sira haree sidade nee, sira hakfodak;
sira tauk hodi halai.
6 Iha nebaa, sira nakdedar makaas;
sira terus hanesan feto nebee atu tuur ahi;
7 sira hanesan roo Tarsis nebee anin lorosae riba tuun-sae.
8 Uluk ita rona tiha ona;
agora ita mos haree ona
iha NAI Maromak Aswain nia sidade,
iha ita nia Maromak nia sidade.
Maromak harii metin sidade nee too tinan ba tinan.
9 Maromak, iha Ita Boot nia uma kreda,
ami medita Ita Boot nia domin rohan-laek.
10 Maromak, ema iha fat-fatin temi Ita Boot nia naran,
too ema husi rai ulun rai ikun iha mundu tomak mos hahii Ita Boot;
Ita Boot nia liman loos nakonu ho justisa.
11 Foho Siaun haksolok;
Judá oan sira kontenti
tanba Ita Boot nia justisa.
12 Lao haleu Siaun, hadulas sidade nee tomak;
sura took nia tore aas;
13 fihir di-diak sidade nia moru;
sukat moru nia aas no mahar,
atu nunee o bele konta ba jerasaun tuir mai katak,
14 Maromak nee mak ita nia Maromak nafatin ba nafatin;
Nia sai ita nia matadalan too tinan ba tinan.