49
Konfia riku-soin la iha folin
Salmu husi Korá nia oan, ba dirijenti koru.
1-2 Imi husi nasaun hotu-hotu, rona mai!
Kiik ho boot, riku ho kiak,
hotu-hotu nebee moris iha mundu, see tilun mai.
3 Hau nia ibun sei koalia buat matenek;
buat nebee hau nia laran medita sei halo imi kompriende.
4 Hau sei see tilun ba lia matenek nian;
hau sei toka viola hodi esplika lia matenek nee.
5 Iha loron dezastre,
bainhira ema aat haleu hau, hau atu tauk saida?
6 Sira nee konfia sira nia riku-soin;
sira foti aan tanba riku boot.
7 La iha ema ida mak bele selu kotu nia vida
ka foo nia riku ba Maromak atu salva nia moris.
8 Tanba ema nia vida folin karun liu;
nia selu ho riku-soin saida deit mos la too
9 atu nia bele moris nafatin ba nafatin,
atu nia la bele tama ba rai kuak.
10 Ita hotu haree katak ema matenek mate,
hanesan mos ema nebee beik-teen la hatene buat ida.
Sira hotu husik sira nia riku-soin ba ema seluk.
11 Uluk sira iha rai luan;
too ikus rate mak sai fali sira nia uma tinan ba tinan;
rai kuak mak sai sira nia hela fatin husi jerasaun ba jerasaun.
12 Maski ema riku, nia la bele moris nafatin;
nia hanesan animal nebee too tempu ida sei mate.
13 Ema nebee konfia nia aan, nia dalan mak nee;
ida nee mak destinu ba ema nebee mak laran metin ba nia lia fuan rasik.
14 Sira nia destinu mak mate;
sira hanesan bibi malae,
mate mak sira nia bibi atan hodi lori sira ba matebian sira nia fatin;
sira tuun kedas ba iha rai kuak.
Rai sei haan tiha sira nia isin;
sira dook tiha ona husi sira nia uma diak nian.
15 Maibee Maromak sei salva hau husi matebian sira nia fatin;
Nia sei dada hau sae ba iha Nia prezensa.
16 Keta preokupa bainhira ema seluk hetan riku;
se nia riku-soin aumenta ba beibeik mos lalika tauk,
17 tanba ema nee mate, sei la lori buat ida;
nia riku-soin la baa hamutuk ho nia.
18 Iha nia moris tomak nia konsidera nia aan ema nebee hetan bensaun;
ema nebee moris diak hanesan nee, ema seluk sempre gaba.
19 Maski nunee nia sei baa hamutuk ho sira nebee baa uluk ona;
nia nunka atu haree tan naroman moris nian.
20 Ema nebee riku maibee falta kompriensaun,
sira hanesan animal nebee too tempu ida sei mate.