50
Sakrifisiu nebee loos
Salmu Asaf nian.
1 NAI Maromak Kbiit Nain
lia tuun hodi bolu ema iha mundu tomak,
husi lorosae too loromonu.
2 Maromak nia naroman leno sai
husi foho Siaun, fatin nebee furak teb-tebes.
3 Ita nia Maromak mai,
Nia sei la nonook;
ahi lakan boot iha hela Nia oin;
anin makaas haleu Nia.
4 Nia bolu lalehan ho rai atu asisti
bainhira Nia foo justisa ba Nia povu; Nia dehan,
5 “Halibur povu nebee foo laran mai Hau;
sira nee halo promesa ho Hau liu husi sakrifisiu tunu.”
6 Lalehan foo sai katak Maromak tesi lia sempre loos,
tanba Nia nee Justisa Nain.
7 “Hau nia povu, rona mai, Hau sei koalia;
Israel, Hau sei foo sasin kontra o.
Hau mak Maromak, o nia Maromak.
8 Laos tanba o nia sakrifisiu la too mak Hau foo sala ba o;
sakrifisiu tunu nebee imi foo, sempre iha Hau nia oin.
9 Hau la presiza karau husi o nia luhan
ka bibi husi o nia luhan laran,
10 tanba animal hotu-hotu iha ai laran Hau nian;
karau iha foho rihun ba rihun mos Hau nian.
11 Hau hatene manu hotu-hotu iha foho;
buat saida deit mak book aan iha rai fuik, Hau nian hotu.
12 Se Hau hamlaha karik, Hau la hatete ba o,
tanba mundu ho buat hotu nebee mak iha laran, nee Hau nian.
13 Imi hanoin katak Hau haan naan karau aman ka?
Hau hemu bibi aman nia raan ka?
14 Diak liu foo agradesimentu nudar o nia sakrifisiu ba Maromak;
halo tuir o nia promesa ba Maromak Aas Liu.
15 Bainhira o iha susar laran, harohan mai Hau
mak Hau sei salva o, no o sei foti aas Hau nia naran.”
16 Maibee ba ema aat, Maromak hatete nunee:
“O temi beibeik Hau nia ukun fuan atu halo saida?
O nia ibun koalia hela deit hau nia promesa atu halo saida?
17 Afinal o lakohi atu Hau koriji o;
o soe Hau nia liafuan ba kotuk.
18 Bainhira o haree naok-teen, o baa hamutuk ho nia;
o ranxu ema nebee halo sala seksual.
19 O husik o nia ibun koalia buat aat;
o foo o nia nanaal ba liafuan bosok.
20 O tuur koalia aat o nia maun-alin;
o hatete aat o nia inan nia oan.
21 Bainhira o halo buat sira nee, Hau nonook deit,
too o hanoin Hau mos hanesan ho o.
Maibee agora Hau foo sala ba o
hodi foo sai o nia hahalok ida-idak.
22 Imi sira nebee haluha Maromak, rona mai!
Se lae Hau sei lees tiha imi, la iha ema ida bele salva imi.
23 Bainhira ema foo agradese mai Hau,
nee mak sakrifisiu ida nebee foti aas Hau nia naran;
ema nebee mak lao iha dalan loos,
Hau, Maromak sei hatudu Hau nia salvasaun ba nia.”