51
Orasaun husu perdaun
Salmu David nian, bainhira profeta Natan mai hasee David tanba nia halo sala ho Batseba. Ba dirijenti koru.
1 Nai Maromak, hanoin hau ba!
Tanba Ita Boot nia domin nunka hotu.
Ita Boot nee laran luak,
nunee halakon tiha hau nia hahalok aat hotu-hotu.
2 Fase moos hau nia pekadu;
hamoos hau nia sala.
3 Tanba hau rekonhese hau nia hahalok aat;
hau nia sala sempre mosu iha hau nia hanoin.
4 Hau halo sala kontra Ita Boot, so Ita Boot deit;
hau halo tiha ona buat nebee aat iha Ita Boot nia oin.
Nunee Ita Boot hakotu hau nia lia, kona duni;
Ita Boot hatuun kastigu mai hau nee loos.
5 Tebes duni, hau moris mai sala nanis kedas;
hau sala nain husi tempu nebee hau nia inan foin isin rua.
6 Maibee Ita Boot hakarak atu hau nia laran tenki moos,
nunee hanorin hau atu hau sai matenek.
7 Hisik bee ba hau hodi ai hisopu para hau sai moos;
fase moos tiha hau mak hau sei sai mutin liu fali kabas rahun.
8 Foo ksolok ho kontenti mai hau.
Ita Boot harahun tiha ona hau nia ruin;
agora husik hau hamriik fali ho haksolok.
9 Keta haree ba hau nia sala;
halakon tiha hau nia pekadu.
10 Maromak, halo hau nia neon moos;
hafoun hau nia laran halo hau laran metin ba Ita Boot.
11 Keta duni sai hau husi Ita Boot nia oin;
keta hasai Ita Boot nia Espiritu Santu husi hau.
12 Halo hau haksolok fila fali tanba Ita Boot salva tiha ona hau;
halo hau nia laran prontu atu moris tuir Ita Boot nia hakarak.
13 Depois hau sei hanorin Ita Boot nia dalan ba ema sala nain sira,
atu nunee sira bele fila fali ba Ita Boot.
14 Maromak hau nia Salvador,
salva hau husi ema nebee mak eziji hau nia raan fakar.
Nunee hau sei hananu kona ba Ita Boot nia salvasaun.
15 Nai Maromak, loke hau nia ibun
mak hau sei hahii Ita Boot.
16 Se hau oho animal hodi halo sakrifisiu ba Ita Boot, nee la halo haksolok Ita Boot nia laran;
Maski hau lori sakrifisiu tunu mos, la halo Ita Boot kontenti.
17 Maromak, hau nia sakrifisiu mak hau nia fuan nebee rahun,
hau nia laran nebee dodok, nakonu ho arependimentu.
Sakrifisiu nee monu duni ba Ita Boot nia laran.
18 Hatudu Ita Boot nia laran diak ba povu Siaun para povu bele hetan diak;
harii fila fali moru haleu sira nia sidade Jerusalém nee.
19 Depois Ita Boot nia laran sei kontenti ho sakrifisiu lo-loos,
sakrifisiu tunu nebee ami oferese tomak ba Ita Boot.
Ami sei oferese karau aman boot hodi tunu iha Ita Boot nia altar.