52
Kastigu ba ema aat sira
Salmu David nian, bainhira ema Edom ida naran Doeg baa kesar ba Saul dehan, “David baa tiha ona iha Ahimelek nia uma.” Salmu nee para hanorin ema. Ba dirijenti koru.
1 Eroi boot, nusaa mak o gaba aan kona ba hahalok aat
hasoru ema nebee Maromak hadomi?
2 Lohi door, o iha planu atu halo aat ema;
o nia ibun kroat hanesan tudik.
3 O gosta buat aat liu fali buat diak;
o gosta koalia bosok liu fali koalia buat nebee loos.
4 Lohi-teen, o gosta koalia liafuan nebee halo terus ema.
5 Nee duni, Maromak sei riba tuun o tinan ba tinan;
Nia sei kaer o hodi rakut o sai husi o nia tenda;
Nia sei fokit o sai husi ema moris sira nia rain.
6 Ema nebee moris loos sei haree no tauk;
sira sei hamnasa o hodi dehan,
7 “Haree took ema nee!
Nia la buka mahon iha Maromak,
maibee konfia fali nia riku-soin bar-barak,
no hamahon aan iha hahalok nebee aat.”
8 Maibee hau nee hanesan ai huun oliveira
nebee moris buras iha Maromak nia uma.
Hau konfia Maromak nia domin rohan-laek
nafatin ba nafatin.
9 Maromak, hau sei agradese ba Ita Boot tinan ba tinan
tanba buat nebee Ita Boot halo tiha ona;
hau sei haklaken Ita Boot nia naran iha Ita Boot nia povu nia leet,
tanba Ita Boot nee diak.