74
Halerik ba Nai Maromak tanba uma kreda rahun
Salmu Asaf nian para hanorin ema.
1 Maromak, tansaa mak Ita Boot soe ami nafatin ba nafatin?
Tansaa mak Ita Boot laran nakali hasoru Ita Boot nia bibi sira?
2 Hori uluk kedas Ita Boot hili povu ida nee;
Ita Boot salva tiha ona povu nee sai Ita Boot nian;
hanoin fila fali ami ba!
Uluk Ita Boot hela iha foho Siaun;
hanoin fali fatin nee ba.
3 Hakmaan Ita Boot nia ain lao ba iha fatin santu;
fatin nee rahun aat liu ona;
buat hotu-hotu inimigu estraga tiha ona.
4 Ita Boot nia funu baluk haklalak ona iha Ita Boot nia fatin santu;
sira hasae tiha ona sira nia bandeira.
5 Sira tama hanesan fali ema nebee kaer baliu
hodi tesi ai huun buras.
6 Sira kaer baliu ho martelu
hodi sobu rahun tiha uma nia didin nebee ema bahat halo furak.
7 Sira sunu mutuk tiha Ita Boot nia fatin santu too rai;
sira hafoer Ita Boot nia hela fatin.
8 Sira hatete iha sira nia laran, “Mai ita hanehan makaas ema sira nee hotu!”
Fatin hotu-hotu nebee ema adora Maromak iha rai nee, sira sunu hotu ona.
9 Ami la haree tan sinal husi Maromak;
profeta mos la iha ona;
ami sira nee la iha ida mak hatene bainhira mak hotu.
10 Maromak, inimigu sira sei hatete aat Ita Boot too bainhira?
Funu baluk sira nee sei koalia aat Ita Boot nia naran nafatin ba nafatin ka?
11 Tansaa mak Ita Boot dada fali Ita Boot nia liman loos?
Foti Ita Boot nia liman hodi halo mohu tiha sira ba.
12 Maibee Maromak nee hau nia Liurai hori uluk kedas;
Ita Boot lori salvasaun ba mundu.
13 Uluk Ita Boot hafahe tasi hodi Ita Boot nia kbiit;
Ita Boot mak fera samea boot nia ulun iha tasi laran.
14 Samea boot Leviatán nia ulun fatuk bar-barak, Ita Boot harahun tiha
hodi foo haan animal nebee hela iha rai fuik maran.
15 Ita Boot loke tiha bee matan ho mota;
mota sira nebee suli la para, Ita Boot hamaran tiha.
16 Loron Ita Boot nian, kalan mos Ita Boot nian;
Ita Boot hatuur fulan ho loro matan.
17 Ita Boot tau mundu nia baliza;
tempu udan no tempu bailoron, Ita Boot halo rua nee hotu.
18 NAI Maromak, keta haluha katak inimigu hamnasa fali Ita Boot;
ema beik-teen sira nee hatete aat Ita Boot nia naran.
19 Keta entrega Ita Boot nia manu pombu ba animal fuik;
keta haluha Ita Boot nia povu kbiit-laek sira tinan ba tinan.
20 Hanoin nafatin Ita Boot nia promesa mai ami,
tanba fatin nakukun iha rai nee mesak violensia nia knuuk deit.
21 Keta husik ema hamoe tan vitima sira;
halo ema kiak ho kbiit-laek hahii Ita Boot nia naran.
22 Maromak, hamriik ba! Defende Ita Boot nia lia;
keta haluha katak ema beik-teen sira hatete aat Ita Boot iha loron tomak.
23 Keta haluha Ita Boot nia inimigu sira nia lian;
ema nebee kontra Ita Boot hakilar la para.