73
Nai Maromak mak Justisa Nain
Salmu Asaf nian.
1 Maromak nee diak ba Israel;
tebes, Nia diak ba ema nebee mak laran moos.
2 Maibee hau nee, hau nia ain besik atu sidi;
uitoan tan hau atu monu ona,
3 tanba hau laran moras ba ema nebee foti aan;
hau haree sira moris diak maski sira nia hahalok aat.
4 Ema sira nee la hatene terus;
sira nia isin diak no forti.
5 Sira la hetan susar nebee ema baibain hetan iha mundu nee;
dezastre la kona sira hanesan ema seluk.
6 Tanba nee sira hahenu sira nia hahalok foti aan;
sira foo hatais sira nia aan ho violensia.
7 Sira nia laran hakiak sala;
sira nia neon nakonu ho buat nebee la iha folin.
8 Sira soe lia hodi hatete buat mesak aat;
sira foti aan hodi ameasa atu hanehan ema seluk.
9 Sira loke ibun hodi kontra lalehan;
sira nia liafuan foti aan lao haleu mundu tomak.
10 Tanba nee povu fila hodi tuir sira,
no fiar sira nia liafuan hotu.
11 Sira dehan, “Oinsaa Maromak atu hatene buat sira nee?
Maromak Aas Liu hatene saida?”
12 Ema aat sira hanesan nee duni;
sira sempre moris diak, sira nia riku-soin aumenta ba beibeik.
13 Hau kuidadu beibeik atu moris ho laran moos,
maibee saugati deit;
hau fase hau nia liman hanesan sinal katak hau la sala ida,
maibee la vale buat ida.
14 Tanba loron tomak hau terus hela deit;
iha dadeer-dadeer hau hetan kastigu.
15 Se karik hau dehan nunee,
entaun hau hanesan fali traidor ba Ita Boot nia povu.
16 Bainhira hau koko atu kompriende buat sira nee,
hau senti susar teb-tebes.
17 Too hau tama iha Maromak nia uma kreda
mak foin hau kompriende ema sira nee nia destinu.
18 Tebes duni, Ita Boot tau sira iha fatin namdoras;
Ita Boot halo sira monu too rahun tiha.
19 Derepenti deit sira mohu;
sira tauk teb-tebes too tauk nee hamate fali sira.
20 Sira hanesan mehi deit,
ita hadeer mai la iha tiha;
Nai Maromak, bainhira Ita Boot hamriik,
Ita Boot sei la hanoin tan sira.
21 Bainhira hau nia laran senti tristi
no hau nia fuan moras,
22 hau sai beik tiha, la kompriende buat ida;
hau nia hahalok hasoru Ita Boot hanesan fali animal fuik.
23 Maski nunee hau nafatin besik Ita Boot;
Ita Boot kaer metin hau nia liman loos.
24 Ita Boot hanorin hau no hatudu dalan mai hau;
too ikus Ita Boot sei simu hau hodi foti sae hau.
25 Iha lalehan nebaa, Ita Boot mak tulun hau; se laos Ita Boot, see tan?
Iha mundu nee, hau hakarak mak Ita Boot deit.
26 Hau nia isin ho hau nia laran bele sai fraku,
maibee Maromak mak hakbiit hau nia laran;
hau nia riku-soin mak Nia too tinan ba tinan.
27 Ema nebee dook husi Ita Boot sei mate mohu;
Ita Boot harahun tiha ema nebee mak la foo laran ba Ita Boot.
28 Maibee hau nee gosta liu besik Maromak;
hau hamahon aan iha NAI Maromak Kbiit Nain;
hau sei foo sai buat diak nebee Ita Boot halo.