72
Orasaun ba liurai
Salmu Salomão nian.
1 Maromak, hanorin Ita Boot nia justisa ba liurai;
hanorin Ita Boot nia lia loos ba liurai oan,
2 atu liurai bele foo justisa ba Ita Boot nia povu tuir dalan loos,
atu nia bele tesi lia lo-loos ba Ita Boot nia ema nebee kbiit-laek.
3 Nunee foho sira nee sei buras hodi foo moris diak ba povu,
no ema iha rai nee bele moris loos.
4 Hau harohan atu liurai bele defende ema kbiit-laek iha povu nia leet,
salva ema kiak nia oan,
no halakon tiha hanehan door sira.
5 Hau harohan atu liurai dura hanesan loro matan,
dura hanesan fulan, husi jerasaun ba jerasaun.
6 Halo liurai sai hanesan udan been monu tuun mai rai
hodi rega duut nebee foin lere.
7 Durante nia ukun, halo ema moris loos sai buras
hodi moris diak, too fulan lakon tiha husi lalehan.
8 Hau harohan atu liurai ukun husi tasi ba tasi,
husi Mota Eufrates too rai ulun rai ikun iha mundu tomak.
9 Halo suku sira iha rai fuik maran hakneak hakruuk iha liurai nia oin;
halo nia inimigu sira lambe rai.
10 Hau harohan atu liurai Tarsis ho liurai sira husi tasi balu
lori prezenti ba nia,
no liurai sira husi rai Sabá ho Seba
lori prezenti foo ba nia.
11 Hau harohan atu liurai hotu-hotu hakneak hakruuk ba nia,
no nasaun hotu-hotu serbi nia.
12 Tanba liurai salva ema kiak sira nebee halerik ba nia;
nia ajuda ema kbiit-laek sira nebee mak la iha ema atu tau matan.
13 Nia hanoin ema kiik ho ema kiak sira
hodi salva sira nia moris.
14 Nia salva sira husi ema nebee hanehan sira ho ema nebee halo violensia ba sira,
tanba sira nia moris folin boot iha nia matan.
15 Viva liurai!
Hau harohan atu ema lori oferta osan mean husi rai Sabá foo ba liurai,
no ema sempre halo orasaun ba nia
hodi foo bensaun ba nia iha loron tomak.
16 Hau harohan atu iha nia rai tomak iha hahaan barak;
iha foho tutun mos toos bele buras.
Hau husu atu ai fuan tebar hanesan iha rai Líbanu,
no nia povu iha sidade mos buras hanesan duut matak iha rai fuik.
17 Hau harohan atu liurai nia naran dura ba nafatin,
dura hanesan loro matan iha lalehan.
Hau husu atu nasaun hotu-hotu hetan bensaun liu husi nia,
no ema bolu nia ema ida nebee hetan ksolok.
18 Hahii NAI Maromak, Israel nia Maromak!
Nia mesak deit mak halo buat furak.
19 Hahii, foti aas Nia naran tinan ba tinan.
Hau harohan atu Maromak nia kbiit hakonu mundu tomak.
Amen, amen.
20 Orasaun husi David, Jessé nia oan too iha nee deit.