71
Katuas ida harohan atu Nai Maromak proteje
1 NAI Maromak, hau hamahon aan iha Ita Boot;
keta husik hau moe leet.
2 Ita Boot sempre halo buat nebee loos;
salva hau ba, hasai tiha hau husi susar laran;
see tilun mai hau hodi salva hau.
3 Ita Boot mak fatuk lolon boot, husik hau helik ba;
hatuun orden atu salva hau,
tanba Ita Boot mak fatuk kuak nebee hau subar iha laran;
Ita Boot mak lutu haleu hau.
4 Hau nia Maromak, hasai tiha hau husi ema aat sira nia liman laran;
salva hau husi ema laran aat ho hanehan door sira.
5 Nai Maromak, Ita Boot mak hau nia esperansa;
NAI, husi joven kedas hau konfia Ita Boot.
6 Husi kedas hau moris mai, hau sadere nanis ona ba Ita Boot;
husi hau nia inan nia kabun laran, Ita Boot tau matan mai hau.
Hau sempre hahii Ita Boot.
7 Hau sai tiha ona ezemplu ba ema barak;
Ita Boot mak fatin seguru diak nian mai hau.
8 Hau nia ibun sempre hahii Ita Boot;
iha loron tomak hau haklaken Ita Boot nia furak.
9 Keta soe hau bainhira hau idade ona;
keta husik hau bainhira hau nia forsa hotu.
10 Tanba hau nia inimigu sira hatete aat hau;
ema nebee hein atu oho hau, sira kombina malu hela.
11 Sira dehan, “Maromak husik ona nia.
Mai ita duni nia hodi kaer tiha nia,
tanba la iha ida mak atu salva nia.”
12 Hau nia Maromak, keta dook husi hau;
Maromak, mai lalais tulun hau.
13 Hau harohan atu ema nebee kontra hau, Ita Boot hatuun sira hodi halo sira lakon;
husik ema nebee mak hakarak halo aat hau, sai moe boot ho oin tuun.
14 Maibee hau nee sempre laran metin ba Ita Boot;
hau sei kontinua hahii Ita Boot liu tan.
15 Hau nia ibun sei foo sai buat diak nebee Ita Boot halo tiha ona;
loron-kalan hau sei foo sai Ita Boot nia salvasaun,
maski hau sura la bele.
16 NAI Maromak Kbiit Nain, hau sei gaba buat makaas nebee Ita Boot halo;
hau sei gaba Ita Boot nia justisa, so Ita Boot nian deit.
17 Maromak, husi kedas hau joven, Ita Boot hanorin ona hau;
too agora hau foo sai nafatin buat furak nebee Ita Boot halo.
18 Maromak, agora hau katuas fuuk mutin ona,
keta husik hau mesak,
atu hau foo sai Ita Boot nia kbiit ba jerasaun tuir mai,
atu hau konta Ita Boot nia forsa ba ema hotu nebee sei moris aban-bainrua.
19 Maromak, Ita Boot nia justisa too iha lalehan;
Ita Boot halo buat mesak boot.
Maromak, see mak hanesan Ita Boot?
20 Maski Ita Boot halo hau terus ho susar barak,
Ita Boot sei halo hau moris fali;
hau too iha rai kuak laran mos,
Ita Boot sei dada hau sai.
21 Ita Boot sei halo hau nia naran boot liu fali uluk;
Ita Boot sei foo ksolok fali mai hau.
22 Hau nia Maromak, hau sei toka viola hodi hahii Ita Boot,
tanba Ita Boot sempre kaer metin Ita Boot nia liafuan.
Israel nia Maromak santu,
hau sei hananu hahii Ita Boot ho muzika viola tali walu.
23 Hau nia ibun sei haklalak ho haksolok;
hau sei hananu hahii Ita Boot,
tanba Ita Boot salva tiha ona hau.
24 Loron-kalan hau nia ibun sei koalia sai Ita Boot nia justisa,
tanba ema sira nebee hakarak halo aat hau
sai moe boot ho oin tuun tiha.