76
Nai Maromak manaan tiha ona Nia inimigu sira
Salmu Asaf nian. Kantiku ida, akompanha ho viola. Ba dirijenti koru.
1 Maromak konhesidu iha rai Judá;
Nia naran boot iha Israel.
2 Nia uma harii tiha ona iha Jerusalém;
Nia hela fatin iha Siaun.
3 Iha nebaa Nia silu tohar ona inimigu nia rama oan nebee nabilan;
surik ho ekipamentu funu nian sel-seluk, Nia halo tohar hotu.
4 Ita Boot nabilan furak tebes;
Ita Boot makaas liu fali foho nebee iha hori uluk kedas.
5 Inimigu aswain sira nia sasaan ema hadau tiha;
inimigu sira nee toba latan tiha ona;
funu nain sira nia forsa lakon tiha ona.
6 Jacó nia Maromak, Ita Boot nia lian makaas
halo kuda ho nia nain toba latan hotu.
7 Ita Boot makaas teb-tebes!
Bainhira Ita Boot hirus, see mak aguenta hamriik iha Ita Boot nia oin?
8-9 Maromak, Ita Boot hamriik tiha ona hodi foo justisa,
atu salva ema mukit sira hotu iha mundu.
Bainhira Ita Boot hatuun Ita Boot nia desizaun husi lalehan,
mundu tauk hodi nonook tiha.
10 Ema bele hirus mos, sira sei hahii liu tan Ita Boot;
mate restu sira sei adora Ita Boot.
11 Halo promesa ba NAI o nia Maromak, no halo tuir promesa nee;
ema hotu nebee hela haleu Nia, lori imi nia oferta foo ba Ida nebee halo ema tauk.
12 Nia halo ukun nain sira lakon esperansa;
liurai sira iha mundu hamtauk Nia.