77
Iha tempu susar, hanoin Nai Maromak nia diak uluk nian
Salmu Asaf nian, ba dirijenti koru Jedutun.
1 Hau halerik husu tulun ba Maromak;
hau halerik ba Maromak atu Nia rona hau.
2 Iha susar laran, hau buka Nai Maromak;
kalan-kalan hau lolo liman la kole,
maibee hau la hetan ksolok.
3 Bainhira hau hanoin kona ba Maromak, hau halerik;
bainhira hau medita, hau lakon esperansa liu tan.
4 Ita Boot halo hau toba la dukur;
hau laran susar too hau la iha liafuan.
5 Hau hanoin fila fali loron uluk nian;
hau hanoin hetan tempu uluk nian.
6 Iha tempu nebaa hau kanta iha oras kalan.
Agora hau nia laran medita, hau husu ba hau nia aan,
7 “Nai Maromak soe tiha ona ita nafatin ba nafatin ka?
Nia lakohi hatudu tan ona Nia laran diak ka?
8 Nia domin rohan-laek nee lakon tinan ba tinan ka?
Nia promesa nebee Nia halo la vale tan ona ka?
9 Maromak haluha ona Nia laran diak ka?
Nia hirus taka tiha Nia laran luak ka?”
10 Nunee hau hanoin, “Maromak Aas Liu nia liman loos la tulun ita hanesan uluk ona;
ida nee mak halo hau nia laran moras.”
11 Maibee NAI Maromak, hau sei hanoin buat diak nebee Ita Boot halo;
hau sei la haluha Ita Boot nia milagre husi tempu uluk nian.
12 Hau sei hanoin beibeik Ita Boot nia servisu hotu
hodi medita buat furak nebee Ita Boot halo.
13 Maromak, Ita Boot nia dalan nee santu;
la iha tan maromak ida mak boot hanesan ami nia Maromak.
14 Ita Boot Maromak ida nebee halo milagre;
Ita Boot hatudu sai Ita Boot nia kbiit iha nasaun hotu-hotu nia leet.
15 Ita Boot salva ona Ita Boot nia povu hodi Ita Boot nia liman rasik;
Ita Boot salva Jacó ho José nia jerasaun.
16 Maromak, uluk bee haree Ita Boot mai;
bainhira haree, bee nakdoko tiha,
too tasi klean boot mos nakdedar.
17 Kalohan fakar tuun bee;
lalehan tarutu makaas;
Ita Boot nia rama oan semo baa semo mai nabilan loos.
18 Ita Boot halo rai tarutu makaas iha anin fuik laran;
rai lakan husi Ita Boot leno mundu;
rai nakdedar too nakdoko.
19 Ita Boot lao liu husi tasi laran;
Ita Boot nia dalan liu husi bee boot,
maibee Ita Boot nia ain fatin la haree hetan.
20 Ita Boot foti Moisés ho Arão hodi lori Ita Boot nia povu
hanesan bibi atan nebee lori nia bibi.