78
Lisaun husi Israel nia istoria
Salmu Asaf nian para hanorin ema.
1 Hau nia povu, rona hau nia hanorin;
see tilun ba hau nia liafuan.
2 Hau sei konta istoria;
hau sei foo sai liafuan matenek nian nebee desde uluk taka hela.
3 Buat sira nee ita rona tiha ona no hatene tiha ona;
ita nia bei-ala sira konta tiha ona mai ita.
4 Ita sei la subar buat sira nee ba sira nia oan sira;
ita sei konta ba jerasaun tuir mai
buat furak nebee mak NAI Maromak halo,
Nia kbiit, ho milagre nebee mak Nia halo tiha ona.
5 Nia foo Nia regra ba Jacó nia jerasaun;
Nia hatuur Nia lei iha Israel.
Nia haruka ita nia bei-ala sira nee
hanorin tutan lei nee ba sira nia oan sira,
6 atu nunee jerasaun tuir mai bele hatene,
too jerasaun nebee seidauk moris mos
bele hanorin tutan ba sira nia oan sira.
7 Nunee sira sei konfia iha Maromak;
sira sei la haluha buat nebee mak Nia halo tiha ona,
maibee sira sei moris tuir Nia lei.
8 Sira sei la hanesan sira nia bei-ala sira uluk.
Bei-ala sira nee ulun toos no kontra door;
sira nia laran la metin ba Maromak;
sira la foo laran ba Nia.
9 Uluk tropas suku Efraim nian kaer hela rama,
too iha loron funu nian, sira hakiduk.
10 Sira la kaer metin Maromak nia promesa;
sira lakohi moris tuir Nia lei.
11 Sira haluha saida mak Nia halo tiha ona,
milagre nebee Nia hatudu tiha ona ba sira.
12 Nia halo buat boot iha sira nia bei-ala sira nia oin,
iha rejiaun Zoan iha Ejitu nia rain.
13 Nia fahe tiha tasi halo dalan para sira bele hakur;
Nia halo tasi been hamriik hanesan moru.
14 Loron, Nia foo kalohan hodi hatudu dalan ba sira;
kalan tomak, Nia foo ahi hodi leno sira nia dalan.
15 Nia fera tiha fatuk bo-boot iha rai fuik
hodi foo bee ba sira hemu, bee nee boot hanesan tasi.
16 Nia halo bee suli sai husi fatuk kuak,
too bee suli tuun hanesan mota.
17 Maski nunee sira halo sala nafatin hasoru Maromak;
iha rai fuik maran, sira kontra Maromak Aas Liu.
18 Sira koko Maromak
hodi eziji hahaan nebee mak sira kaan.
19 Sira sadik Maromak dehan,
“Maromak bele tau meza iha rai fuik nee ka?
20 Loos duni, Nia fera tiha fatuk
hodi halo bee fakar sai;
bee nee suli sai makaas.
Maibee Nia bele foo paun ba ita ka?
Nia bele fahe naan ba Nia povu ka?”
21 Bainhira NAI Maromak rona ida nee, Nia hirus teb-tebes;
Nia ahi lakan makaas kontra Jacó nia jerasaun;
Nia laran nakali hasoru Israel,
22 tanba sira la fiar ba Nia;
sira la fiar Nia kbiit atu salva sira.
23 Maibee Maromak foo orden ba kalohan;
Nia loke odamatan lalehan nian.
24 Nia hamonu paun manaa ba sira hanesan udan para sira bele haan;
Nia foo hahaan lalehan nian ba sira.
25 Ema mundu nian haan tiha ona hahaan anju sira nian;
Nia foo hahaan ba sira too sira bosu di-diak.
26 Nia foo orden ba anin lorosae nian;
hodi Nia kbiit Nia halo anin tasi mane huu,
27 lori manu fuik barak loos hanesan rai henek iha tasi ibun;
Nia hamonu naan manu barak teb-tebes hanesan rai rahun.
28 Nia halo manu sira nee monu tuun ba iha sira nia akampamentu,
haleu sira nia tenda hotu.
29 Sira haan too bosu di-diak,
tanba Nia foo tiha ona ba sira buat nebee mak sira kaan.
30 Maibee naan nee sei iha hela sira nia ibun laran,
sira sei kaan nafatin atu haan tan,
31 Maromak nia laran nakali hasoru sira.
Nia hamate mane forti sira iha sira nia leet;
Nia lere tiha mane klosan Israel nian.
32 Maski Maromak halo nunee mos, sira halo sala nafatin;
maski Nia halo tiha ona milagre, sira la fiar nafatin.
33 Entaun sira nia moris la vale buat ida, no tauk domina sira,
too Nia hakotu sira nia iis, Nia habadak sira nia tinan.
34 Bainhira Maromak oho sira balu, sira seluk sempre hakbesik ba Nia;
sira fila fali hodi harohan ba Nia.
35 Sira hanoin fali katak Maromak mak fatuk lolon boot hodi satan netik sira;
Maromak Aas Liu mak sira nia Salvador.
36 Maibee sira gaba Nia ho sira nia ibun tutun deit;
sira nia nanaal bosok Nia.
37 Sira nunka foo laran ba Nia;
sira la kaer metin Nia promesa.
38 Bele nunee mos Nia hatudu nafatin Nia laran diak ba sira;
Nia hamoos sira nia sala
hodi la halo mohu sira.
Dala barak Nia hirus iha Nia laran deit;
Nia la fakar sai Nia laran nakali.
39 Nia rekonhese katak ema sira nee isin ho raan deit,
hanesan anin nebee huu liu tiha la fila ona.
40 Dala barak sira kontra Maromak iha rai fuik;
iha rai fuik maran nee sira halo Nia laran dodok!
41 Sira koko Maromak fila-fila;
sira halo Israel nia Maromak Santu laran moras.
42 Sira haluha tiha Nia kbiit;
sira la hanoin tan tempu nebee Nia liberta sira husi inimigu sira.
43 Iha tempu nebaa Nia hatudu sai sinal iha rai Ejitu;
Nia hatudu milagre iha rejiaun Zoan nian.
44 Mota iha sira nia rain, Nia halo nakfilak sai raan hotu,
nunee sira la bele hemu tan bee husi mota.
45 Nia haruka lalar barak hobur sira hodi haan tiha sira;
Nia manda manduku hodi estraga rai nee.
46 Ai haan nebee iha sira nia toos laran, Nia foo ba lakataru haan;
produsaun toos nian, gafanhotu haan tiha.
47 Nia halo mate sira nia uvas ho udan jelu fatuk;
Nia hamate sira nia ai figeira ho jelu fatuk.
48 Nia halo udan jelu fatuk monu ba sira nia karau leten;
Nia husik rai lakan kona sira nia bibi.
49 Nia fakar sai Nia laran nakali ba sira;
Nia hirus teb-tebes, Nia hakribi sira nia hahalok, Nia kontra sira.
Nia haruka Nia anju lubuk ida atu baa hamohu sira.
50 Nia prepara dalan atu hasai Nia hirus;
Nia la salva sira husi mate,
maibee Nia entrega sira ba iha moras aat.
51 Nia oho dasa tiha ema Ejitu sira nia oan mane boot hotu;
husi Ham nia jerasaun, oan mane primeiru mate mohu.
52 Depois Nia lori sai Nia povu liu husi rai fuik
hanesan bibi atan lori nia bibi.
53 Nia tau matan ba sira iha dalan, nunee sira la tauk,
maibee tasi halo mout tiha sira nia inimigu.
54 Nia lori Nia povu ba iha Nia rai santu,
ba iha foho nebee Nia hadau tiha ona ho Nia kbiit.
55 Nia duni sai tiha nasaun sira nebee hela iha nebaa
para Nia povu avansa ba oin.
Nia fahe rai nee ba Nia povu para sai sira nian;
ema sira nee nia uma Nia foo ba suku Israel mak hela fali.
56 Maibee ema Israel koko nafatin Maromak Aas Liu
hodi kontra Nia;
sira la halo tuir Nia regra.
57 Sira la foo laran ba Maromak, sira fila kotuk ba Nia hanesan sira nia bei-ala sira;
sira nee kleuk tuun-sae hanesan rama aat ida.
58 Sira halo Maromak hirus tanba sira hamulak iha sira nia foho lulik;
sira halo Nia laran moras tanba sira adora fali estatua lulik.
59 Haree nunee Maromak nia laran nakali;
Nia fila kotuk ba ema Israel sira.
60 Nia husik tiha Nia hela fatin iha sidade Silo;
Nia abandona tenda nebee Nia harii tiha ona iha ema mundu nia leet.
61 Nia husik tiha inimigu sira hadau kaixoti promesa nian;
kaixoti nebee hatudu sai Nia kbiit ho Nia furak monu fali ba inimigu sira nia liman laran.
62 Nia hirus teb-tebes Nia povu;
Nia husik Nia ema rasik mate ho surik.
63 Ahi haan tiha sira nia mane klosan sira;
sira nia feto klosan sira la kanta tan iha festa kazamentu.
64 Sira nia nai lulik sira mate ho surik;
feto faluk sira la bele tanis lelir.
65 Depois Nai Maromak hadeer fali hanesan ema hadeer husi matan dukur,
hanesan funu nain tua lanu nebee hatene tuir nia aan fali.
66 Nia duni lakon tiha Nia inimigu sira;
Nia halo sira moe tinan ba tinan.
67 Maibee Nia la simu José nia jerasaun;
Nia la hili ona suku Efraim.
68 Nia hili fali suku Judá;
Nia laran monu ba foho Siaun.
69 Iha nebaa Nia harii Nia uma kreda hanesan foho aas ida;
uma kreda nee dura nafatin ba nafatin hanesan mundu.
70 Nia hili Nia atan David sai liurai;
Nia fihir David husi nia servisu nudar bibi atan.
71 David tau matan hela ba bibi, Maromak bolu nia
atu sai fali bibi atan ba Maromak nia povu rasik,
ba ema Israel, Jacó nia jerasaun.
72 David tau matan ba sira ho fuan ho laran;
nia ukun sira ho matenek.