79
Orasaun husu Nai Maromak salva nasaun
Salmu Asaf nian.
1 Maromak, nasaun jentiu sira tama tiha ona iha Ita Boot nia rain;
sira halo foer Ita Boot nia uma kreda santu;
sira sobu rahun tiha ona sidade Jerusalém.
2 Sira husik Ita Boot nia atan sira nia mate isin
sai fali manu fuik nia hahaan;
Ita Boot nia povu nia mate isin
sai tiha ona hahaan ba animal fuik.
3 Sira halo Ita Boot nia povu nia raan suli haleu Jerusalém tomak hanesan fali bee;
la iha ema ida atu hakoi mate isin sira nee.
4 Ami moe iha vizinhu sira nia oin;
ema nebee haleu ami hatete aat ami no hatuun ami.
5 NAI Maromak, Ita Boot atu hirus ami too bainhira?
Too tinan ba tinan ka?
Too bainhira mak Ita Boot nia laran nakali mai ami?
6 Fakar tuun Ita Boot nia hirus ba nasaun sira nebee la konhese Ita Boot,
ba iha nasaun sira nebee la bolu Ita Boot nia naran.
7 Tanba sira haan hotu tiha ona Jacó nia jerasaun;
sira estraga tiha ona nia hela fatin.
8 Keta sura ami nia bei-ala sira nia sala ba iha ami nia leten;
hatudu lalais ita Boot nia laran luak mai ami,
tanba ami fraku liu ona.
9 Maromak, ami nia Salvador, tulun ami ba
atu ema foti aas Ita Boot nia naran;
salva ami no perdua ami nia sala
atu ema tane aas Ita Boot nia naran.
10 La bele husik nasaun jentiu sira dehan fali,
“Ema sira nee nia Maromak iha nebee?”
Halo ami haree Ita Boot selu fali nasaun jentiu sira
tanba sira fakar Ita Boot nia atan sira nia raan.
11 See tilun ba ema dadur sira nia halerik;
hodi Ita Boot nia forsa salva sira nebee mak ema atu oho.
12 Nai, liafuan aat nebee mak ami nia vizinhu sira koalia hasoru Ita Boot,
tiru fali ba iha sira nia hirus matan dala hitu.
13 Nunee ami nudar Ita Boot nia povu,
nudar bibi nebee Ita Boot tau matan,
ami sei agradese ba Ita Boot tinan ba tinan;
ami sei hahii Ita Boot husi jerasaun ba jerasaun.