80
Orasaun atu Nai Maromak hadia fali nasaun
Salmu Asaf nian, tuir muzika “Ai funan liriu promesa nian.” Ba dirijenti koru.
1 Bibi atan Israel,
Ita Boot hatudu dalan ba José nia jerasaun hanesan bibi atan ida lori nia bibi;
see tilun mai ami ba.
Ita Boot tuur iha anju kerubin nia leten hodi ukun;
hatudu Ita Boot nia naroman nabilan
2 ba Efraim, Benjamim ho Manassés sira nia jerasaun.
Hatudu Ita Boot nia kbiit;
mai salva ami ba.
3 Maromak, hadia fali ami nia moris ba;
halo Ita Boot nia oin nabilan leno ami,
atu nunee ami bele hetan salvasaun.
4 NAI Maromak Aswain,
too bainhira mak Ita Boot nia laran nakali hodi lakohi rona Ita Boot nia povu nia orasaun?
5 Ita Boot foo laran tristi ba ami hanesan fali hahaan;
Ita Boot foo ami hemu matan been manko nakonu.
6 Ita Boot halo nasaun vizinhu sira istori malu kona ba ami nia rain;
Ita Boot husik ami nia inimigu sira hamnasa hahaek mai ami.
7 Maromak Aswain, hadia fali ami nia moris ba;
halo Ita Boot nia oin nabilan leno ami,
atu nunee ami bele hetan salvasaun.
8 Ami nee hanesan ai uvas huun ida nebee Ita Boot lori sai husi rai Ejitu;
Ita Boot duni sai tiha nasaun jentiu sira hodi kuda fali ai uvas nee.
9 Ita Boot hamoos tiha rai ba ai uvas nee,
nunee nia abut tama klean iha rai too buras nakonu rai nee.
10 Foho sira hamahon aan iha nia lalatak;
ai huun boot sedru helik iha nia sanak.
11 Nia sanak naruk too iha tasi Mediteráneu;
nia dikin too iha mota Eufrates.
12 Maibee tansaa mak Ita Boot halo rahun tiha lutu?
Agora ema nebee liu bele foti uvas nee nia fuan;
13 fahi fuik husi ai laran mai estraga hela;
animal husi rai fuik mai haan dadauk.
14 Maromak Aswain, fila fali mai ami;
hateke tuun husi lalehan hodi haree.
Tau matan ba uvas huun nee;
15 ida nee Ita Boot nia liman loos mak kuda;
ida nee oan mane nebee Ita Boot rasik foti sae sai Ita Boot nian.
16 Ita Boot nia uvas huun ema tesi tuun tiha ona;
ahi haan mutuk tiha ona.
Hatudu Ita Boot nia oin hirus ba ema sira nee;
halo sira mate mohu tiha.
17 Proteje ema ida nebee mak iha hela Ita Boot nia liman loos;
nia nee ema nia oan mane nebee Ita Boot rasik foti sae sai Ita Boot nian.
18 Depois ami sei la fila kotuk ba Ita Boot;
halo ami moris nafatin mak ami sei temi Ita Boot nia naran.
19 NAI Maromak Aswain, hadia fali ami moris ba;
halo Ita Boot nia oin nabilan leno ami,
atu nunee ami bele hetan salvasaun.