81
Kantiku selebrasaun nian
Salmu Asaf nian, tuir muzika Gitit. Ba dirijenti koru.
1 Haklalak haksolok ba Maromak, Nia mak ita nia forsa;
hananu haklalak ba Jacó nia Maromak!
2 Hananu ba, baku babadook ba;
toka viola ho viola tali sanulu.
3 Huu karau dikur iha tempu fulan nurak;
huu tan bainhira fulan nakonu hodi loke ita nia loron boot.
4 Ida nee mak Israel nia lei,
regulamentu husi Jacó nia Maromak.
5 Bainhira Maromak baa kontra ema Ejitu,
Nia foo orden nee ba José.
Hau rona ona lian ida nebee hau la konhese dehan,
6 “Hau muda sai tiha naha todan iha imi nia kabaas;
imi nia liman livre ona husi bote todan.
7 Uluk imi iha susar laran, imi harohan mai Hau, Hau salva tiha imi;
Hau hataan imi husi kalohan ho rai tarutu nia laran;
Hau koko tiha ona imi iha bee Meriba nian.
8 Hau nia povu, rona mai, Hau sei foo atensaun ba imi;
Israel, tuir loos imi rona mai Hau!
9 Iha imi nia leet maromak seluk la bele iha;
imi la bele adora maromak falsu.
10 Hau mak NAI imi nia Maromak;
Hau mak lori imi sai husi rai Ejitu.
Loke imi nia ibun ba mak Hau foo haan imi too bosu.
11 Maibee Hau nia povu lakohi rona Hau;
Israel lakohi hakruuk mai Hau.
12 Nunee Hau halo sira nia fuan toos tiha
hodi tuir deit sira nia hanoin rasik.
13 Hau hakarak atu Hau nia povu rona mai Hau;
Hau hakarak tebes atu Israel lao tuir Hau nia dalan.
14 Se sira rona Hau, Hau sei halo sira nia inimigu sira lakon lalais deit;
Hau fila Hau nia liman hodi kontra sira nia funu baluk.
15 Ema nebee odi NAI Maromak, sira sei tauk ho nakdedar iha Nia oin;
sira sei hetan kastigu tinan ba tinan.
16 Maibee Hau sei foo haan paun diak nian ba imi;
Hau sei habosu imi ho bani been husi fatuk kuak.”