83
Orasaun husu tulun hodi kontra inimigu
Salmu Asaf nian. Kantiku ida.
1 Maromak, la bele nonook deit;
keta taka tilun;
Maromak, keta lian-laek nunee.
2 Haree ba, Ita Boot nia inimigu sira book aan ona;
ema nebee odi Ita Boot foti aas sira nia ulun.
3 Sira futu lia hasoru Ita Boot nia povu;
sira kombina malu kontra ema nebee Ita Boot tau matan.
4 Sira dehan, “Mai ita harahun tiha sira nia nasaun
atu nunee ema la temi tan Israel nia naran.”
5 Sira lian ida halo planu;
sira konkorda hamutuk atu kontra Ita Boot.
6 Sira nee mak ema Edom ho ema Ismael,
ema Moab ho ema Hagar,
7 ema Gebál, Amon ho Amalék,
ema Filístia, ho ema husi sidade Tiru.
8 Ema Asíria mos hamutuk tiha ona ho sira
hodi haforsa Ló nia jerasaun sira nee.
9 Halakon sira ba, hanesan Ita Boot uluk halakon ema Midián,
hanesan Ita Boot halakon komandante Sízera ho liurai Jabín iha mota Kisón;
10 sira nee mate mohu iha rai Endor;
sira sai tiha ona adubu ba rai nee.
11 Halo sira nia ema boot sira sai hanesan jeneral Oreb ho Zeeb;
halo sira nia ukun nain sira hotu sai hanesan liurai Zebah ho Zalmuna;
12 sira nain rua dehan, “Mai ita hadau tiha rai nebee Maromak tau matan
hodi sai fali ita nian.”
13 Hau nia Maromak, halo sira hanesan rai rahun nebee anin fuik lori,
hanesan duut maran nebee anin huu lakon tiha.
14-15 Duni tuir sira ho Ita Boot nia anin makaas;
hatauk sira ho Ita Boot nia anin fuik,
hanesan ahi haan ai laran,
hanesan ahi sunu mutuk foho.
16 NAI Maromak, halo sira moe boot,
atu nunee sira bele buka Ita Boot.
17 Halo sira moe ho oin tuun tinan ba tinan;
husik sira mate ho naran aat.
18 Halo sira rekonhese katak Ita Boot mak NAI Maromak;
Ita Boot mesak mak Maromak Aas Liu iha mundu rai klaran.