84
Hakarak atu hela iha Nai Maromak nia uma
Salmu husi Korá nia oan, tuir muzika “Gitit.” Ba dirijenti koru.
1 NAI Maromak Aswain,
Ita Boot nia hela fatin furak teb-tebes!
2 Hau lakohi hein tan, hau hakarak teb-tebes
atu tama iha NAI nia uma kreda;
hau nia isin ho klamar haklalak haksolok
ba Maromak Moris.
3 NAI Maromak Aswain,
hau nia Liurai, hau nia Maromak,
besik iha Ita Boot nia altar,
manu liin halo nia knuuk;
manu lakateu mos halo nia uma
para luut sira nia oan iha nebaa.
4 Ema nebee hela iha Ita Boot nia uma
hodi adora hela deit Ita Boot, sira hetan ksolok.
5 Ema nebee mak hetan kbiit husi Ita Boot,
ema nebee hakarak ho laran atu baa iha Ita Boot nia foho santu, sira hetan ksolok.
6 Bainhira sira lao liu husi Rai Klean Tanis nian,
bee matan barak mosu iha nebaa;
udan monu rai hodi foo bensaun ba rai nee.
7 Sira lao forti ba dadauk,
too sira ida-ida tama iha Maromak nia prezensa iha foho Siaun.
8 NAI Maromak Aswain, rona hau nia orasaun;
Jacó nia Maromak, see tilun mai hau.
9 Maromak, haree di-diak liurai nebee mak defende ami;
tau matan ba liurai nebee mak Ita Boot hili ona nee.
10 Diak liu loron ida iha Ita Boot nia uma kreda
duke loron rihun ida iha fatin seluk.
Hau gosta liu hein odamatan iha hau nia Maromak nia uma
duke hela iha ema aat nia tenda laran.
11 Tanba NAI Maromak mak loro matan hodi leno ita, Nia defende ita;
Nia hatudu laran diak ba ita no foti aas ita;
NAI nunka subar buat diak
ba ema nebee lao tuir dalan loos.
12 NAI Maromak Aswain,
ema hotu nebee laran metin ba Ita Boot, sira hetan ksolok.