85
Orasaun atu nasaun moris diak
Salmu husi Korá nia oan, ba dirijenti koru.
1 NAI Maromak, uluk Ita Boot hatudu laran diak ba Ita Boot nia rain
hodi halo Jacó nia jerasaun moris diak fali.
2 Ita Boot perdua tiha ona hahalok aat nebee Ita Boot nia povu halo
hodi taka tiha sira nia sala hotu-hotu.
3 Ita Boot lakohi hirus tan sira,
no la fakar tan Ita Boot nia laran nakali ba sira.
4 Maromak ami nia Salvador, hadia fali ami nia moris ba;
halakon tiha Ita Boot nia laran moras ba ami.
5 Ita Boot sei hirus ami nafatin ba nafatin ka?
Ita Boot atu hanaruk Ita Boot nia hirus husi jerasaun ba jerasaun ka?
6 Halo Ita Boot nia povu moris fali ba
atu ami bele haksolok ho Ita Boot nia diak.
7 NAI Maromak, hatudu Ita Boot nia domin rohan-laek mai ami
hodi salva ami.
8 Hau sei see tilun ba buat nebee NAI Maromak koalia;
Nia promete pas ba Nia povu, ba ema nebee foo laran ba Nia,
naran katak sira la bele fila fali ba buat beik.
9 Tebes, Nia salvasaun besik ema nebee mak hamtauk Nia,
nunee Nia kbiit sei hela metin iha ita nia rain.
10 Domin ho lia loos hasoru malu;
justisa ho pas rei malu.
11 Lia loos sei moris buras husi rai;
justisa sei hateke tuun husi lalehan.
12 Loos duni, NAI Maromak sei haraik buat nebee diak;
ita nia toos sei foo ai haan barak.
13 Lia loos lao uluk iha Nia futar oin
hodi prepara dalan ba Nia atu lao tuir.