86
Orasaun husu tulun
Orasaun David nian.
1 NAI Maromak, rona hau hodi hataan hau ba,
tanba hau kiak ho kbiit-laek.
2 Kuidadu hau nia moris, tanba hau foo laran ba Ita Boot;
salva Ita Boot nia atan hau, tanba hau konfia Ita Boot.
Ita Boot mak hau nia Maromak.
3 Nai, loron-kalan hau halerik ba Ita Boot;
hanoin hau ba.
4 Nai, foo ksolok ba Ita Boot nia atan hau,
tanba hau fiar Ita Boot.
5 Nai, Ita Boot nee diak no gosta perdua ema;
Ita Boot sempre hatudu domin rohan-laek ba ema nebee mak harohan ba Ita Boot.
6 NAI Maromak, rona hau nia orasaun;
hau halerik husu tulun ba Ita Boot, see tilun ba.
7 Iha tempu susar, hau harohan ba Ita Boot;
Ita Boot sei hataan hau.
8 Nai Maromak, iha maromak sel-seluk nia leet, la iha ida mak hanesan Ita Boot;
la iha buat ida mak bele kompara ho buat nebee Ita Boot halo tiha ona.
9 Nai, nasaun hotu-hotu nebee Ita Boot halo
sei mai adora Ita Boot;
sira sei foti aas Ita Boot nia naran.
10 Tanba Ita Boot makaas no halo buat mesak furak;
Ita Boot deit mak Maromak.
11 NAI Maromak, hanorin Ita Boot nia dalan mai hau,
atu hau bele moris tuir Ita Boot nia lia loos;
halo hau nia laran firmi,
atu hau bele hamtauk deit ba Ita Boot nia naran.
12 Nai, hau nia Maromak, hau sei hahii Ita Boot ho hau nia laran tomak;
hau sei foti aas Ita Boot nia naran tinan ba tinan.
13 Tanba Ita Boot nia domin mai hau boot teb-tebes;
Ita Boot salva tiha ona hau nia vida husi matebian sira nia fatin.
14 Maromak, ema foti aan sira ataka hela hau;
grupu laran aat hakarak hasai hau nia vida;
sira la interese Ita Boot.
15 Maibee Nai, Ita Boot nee Maromak laran diak no laran luak;
Ita Boot Pasiensia Nain, nakonu ho domin rohan-laek no sempre halo buat nebee mak loos.
16 Fila oin mai hau hodi hanoin hau ba;
haraik Ita Boot nia forsa ba Ita Boot nia atan hau;
hau Ita Boot nia atan feto nia oan, salva hau ba.
17 Hatudu netik sinal ida katak Ita Boot laran diak mai hau.
Nunee ema nebee odi hau bele haree no moe,
tanba NAI Maromak, Ita Boot tulun ona hau no foo ksolok mai hau.