88
Orasaun iha tempu susar boot
Salmu husi Korá nia oan, tuir muzika “Mahalat Leanot.” Kantiku ida husi Heman, ema Kanaán, para hanorin ema. Ba dirijenti koru.
1 NAI Maromak, hau nia Salvador,
loron-kalan hau halerik husu tulun ba Ita Boot.
2 Simu hau nia orasaun ba;
see tilun ba hau nia harohan.
3 Hau nia laran nakonu ho susar;
hau besik ona ba iha ema mate nia fatin.
4 Ema sura tiha ona hau hamutuk ho ema nebee lao tuun dadauk ba rai kuak;
hau hanesan ema ida nebee la iha forsa.
5 Hau hela mes-mesak iha ema mate sira nia klaran;
hau hanesan vitima nebee ema oho hodi latan iha rate laran.
Ema mate sira nee Ita Boot la hanoin tan ona;
Ita Boot la tulun ona sira.
6 Ita Boot soe tiha ona hau tuun liu iha rai kuak naruk,
iha fatin nakukun teb-tebes.
7 Ita Boot nia hirus halo todan hau;
Ita Boot halo laloran makaas mai hotu hodi hanehan hau.
8 Ita Boot haketak tiha hau husi hau nia belun diak;
Ita Boot halo sira hakribi hau;
hau iha hela fatin kloot, no sai la diak;
9 hau nia matan malahuk tanba hau tristi liu.
NAI Maromak, loro-loron hau harohan ba Ita Boot;
hau hasae hau nia liman ba Ita Boot.
10 Ita Boot hatudu milagre ba ema mate sira ka?
Matebian sira hadeer fali hodi hahii Ita Boot ka?
11 Ema foo sai Ita Boot nia domin iha rate laran ka?
Ema deklara Ita Boot nia salvasaun iha mate sira nia rain ka?
12 Iha fatin nakukun nian, ema rekonhese Ita Boot nia milagre ka?
Iha fatin nebee ema haluha buat hotu-hotu, ema sei hatene Ita Boot nia justisa ka?
13 Maibee NAI Maromak, hau harohan husu tulun ba Ita Boot;
dadeer-dadeer hau nia orasaun sae ba iha Ita Boot nia oin.
14 NAI, tansaa mak Ita Boot la simu hau?
Tansaa mak Ita Boot subar oin mai hau?
15 Komesa husi joven, hau hetan terus no besik atu mate;
Ita Boot husik hela todan iha hau nia leten too hau lakon esperansa.
16 Ita Boot nia laran nakali domina hela hau;
Ita Boot asalta hau halo hau mohu.
17 Iha loron tomak Ita Boot nia hirus hanesan bee boot ida nebee dulas haleu,
halo hau mout sal-sala.
18 Ita Boot hasai tiha ona hau husi hau nia belun ho vizinhu sira;
agora nakukun mak sai fali hau nia belun.