89
Nai Maromak nia promesa ba liurai David
Salmu husi Etán, ema Kanaán, para hanorin ema.
1 NAI Maromak, hau sei hananu tinan ba tinan kona ba Ita Boot nia domin rohan-laek;
husi jerasaun ba jerasaun hau nia ibun sei foo sai katak Ita Boot sempre halo buat nebee mak loos.
2 Hau sei deklara katak Ita Boot nia domin metin nafatin ba nafatin;
Ita Boot nia lia loos dura hanesan lalehan.
3 Uluk Ita Boot hatete nunee: “Hau halo ona promesa ho ema ida nebee Hau hili;
Hau jura tiha ona ba Hau nia atan David dehan,
4 ‘Hau sei halo o nia jerasaun ukun tinan ba tinan;
sira sei sai liurai husi jerasaun ba jerasaun.’ ”
5 NAI Maromak, lalehan hahii buat furak nebee Ita Boot halo;
espiritu bo-boot sira halibur malu hahii NAI tanba NAI sempre halo buat nebee mak loos.
6 Iha lalehan, see mak bele kompara ho NAI?
Hotu-hotu nebee iha lalehan, see mak hanesan NAI?
7 Maromak makaas liu fali espiritu bo-boot nebee haleu Nia;
sira hotu hamtauk teb-tebes Nia.
8 NAI Maromak Aswain, see mak makaas hanesan Ita Boot?
NAI, Ita Boot sempre halo buat nebee mak loos.
9 Ita Boot mak ukun tasi nebee nafurin sae;
bainhira laloran makaas, Ita Boot mak halo hakmatek fali.
10 Ita Boot buti mate samea boot Rahab;
hodi Ita Boot nia liman forti Ita Boot halo inimigu sira halai namkari tiha.
11 Lalehan nee Ita Boot nian, rai mos Ita Boot nian hotu;
mundu ho buat hotu-hotu iha laran, Ita Boot mak harii.
12 Parte norte ho sul, Ita Boot mak kria;
foho Tabor ho Hermon haksolok hodi hahii Ita Boot nia naran.
13 Ita Boot nia liman forsa;
Ita Boot nia liman forti;
Ita Boot nia liman loos makaas teb-tebes.
14 Ita Boot ukun nudar Liurai tuir lia loos ho justisa;
Ita Boot ukun ho domin, no sempre halo buat nebee mak loos.
15 NAI Maromak, ema nebee hatene haklalak hodi hahii Ita Boot,
ema nebee lao iha Ita Boot nia futar oin naroman,
sira nee hetan ksolok.
16 Loron-kalan sira haksolok tanba Ita Boot nia naran;
sira haksolok haklalak tanba Ita Boot nia lia loos.
17 Tanba Ita Boot mak sira nia kbiit no sira nia forsa;
Ita Boot nia laran diak halo ami manaan.
18 Tebes duni, NAI Maromak mak hili ema ida sai ami nia defensor;
ami nia liurai nee nia Nain mak Israel nia Maromak Santu.
19 Uluk Ita Boot koalia liu husi mehi
hodi hatete ba Ita Boot nia povu santu dehan,
“Hau tau tiha ona koroa liurai nian ba iha aswain ida nia ulun;
Hau foti sae mane joven ida husi povu nia leet.
20 Hau hetan Hau nia atan David;
Hau kose Hau nia mina santu ba nia hodi halo nia sai liurai.
21 Hau nia liman sei tane nia;
Hau nia liman sei halo nia forsa.
22 Inimigu sira sei la liu nia;
ema aat sei la hanehan nia.
23 Hau sei sama hanehan nia funu baluk sira iha nia oin;
ema nebee odi nia, Hau sei oho tiha.
24 Hau sei hadomi nia hodi kaer metin Hau nia promesa ba nia;
hodi Hau nia naran, nia sei manaan.
25 Hau sei halo nia liman ukun tasi;
nia liman loos ukun mota.
26 Nia sei dehan sai mai Hau,
‘Ita Boot mak hau nia Aman,
hau nia Maromak;
Ita Boot mak fatuk lolon boot nebee hau helik ba para hetan salvasaun.’
27 Hau sei foti nia nudar Hau nia oan mane boot;
nia mak liurai boot liu iha mundu.
28 Hau sei foo Hau nia domin ba nia tinan ba tinan;
Hau nia promesa ho Hau nia lei la hotu la remata.
29 Hau sei halo nia jerasaun ukun tinan ba tinan;
sira nia ukun sei dura hanesan lalehan.
30 Se karik nia oan sira husik tiha Hau nia lei,
no la tuir Hau nia regulamentu,
31 se karik sira viola Hau nia regra,
no la kaer metin Hau nia ukun fuan,
32 entaun Hau sei kastigu sira ho rota tanba sira halo sala hasoru Hau;
Hau sei baku sira ho sikoti tanba sira halo pekadu.
33 Maibee Hau sei la hasai fali Hau nia domin husi nia;
Hau sei la haluha Hau nia promesa.
34 Hau sei la kontra hau nia promesa ho nia;
liafuan nebee sai husi Hau nia ibun, sei la muda.
35 Hau sei la bosok David;
Hau jura tiha ona dala ida hodi Hau nia naran santu;
juramentu nee dura ba nafatin katak,
36 nia jerasaun sei ukun tinan ba tinan;
nia ukun dura iha Hau nia oin hanesan loro matan;
37 nia ukun harii metin nafatin ba nafatin hanesan fulan;
fulan nee mos foo sasin lo-loos husi kalohan.”
38 Maibee agora Ita Boot la simu liurai hodi soe tiha nia;
Ita Boot hirus teb-tebes ho ema nebee mak Ita Boot hili ona nee.
39 Ita Boot kansela tiha promesa ho Ita Boot nia atan;
Ita Boot soe nia koroa ba iha rai rahun.
40 Ita Boot baku rahun tiha hotu moru sidade nian
hodi estraga tiha nia fatin seguru.
41 Ema hotu nebee liu husi nebaa hadau nia sasaan;
nia vizinhu sira hamnasa fali nia.
42 Ita Boot halo nia funu baluk sira manaan;
Ita Boot halo nia inimigu sira hotu kontenti.
43 Ita Boot mos fila tiha nia surik nia kroat,
no la ajuda nia iha funu laran.
44 Ita Boot hasai tiha nia poder;
nia kadeira ukun, Ita Boot soe tiha ba rai.
45 Ita Boot habadak tiha ona nia vida joven;
Ita Boot falun nia ho moe.
46 NAI Maromak, Ita Boot subar Aan beibeik too bainhira? Too tinan ba tinan ka?
Ita Boot nia hirus lakan hanesan ahi too bainhira?
47 Keta haluha katak hau nia moris badak deit;
Ita Boot kria ema umanu la iha folin.
48 See mak bele moris ba beibeik no nunka mate?
See mak bele halai sees husi forsa rai kuak nian?
49 Nai Maromak, uluk Ita Boot jura ho laran atu foo domin rohan-laek ba David.
Agora Ita Boot nia domin nee iha nebee ona?
50 Nai, haree ba, ema tarata Ita Boot nia atan hau;
hau hulan hela liafuan aat nebee ema barak hatete kona ba hau.
51 NAI, Ita Boot nia inimigu sira tarata hau;
iha nebee-nebee deit sira hatete aat liurai nebee Ita Boot hili tiha ona.
52 Hahii NAI Maromak tinan ba tinan!
Amen, amen.