90
Husu Nai Maromak nia laran diak tanba ita ema nia moris badak deit
Orasaun husi Moisés, Maromak nia ema uma laran.
1 Nai Maromak, Ita Boot mak ami nia hela fatin
husi jerasaun ba jerasaun.
2 Molok Ita Boot halo mundu rai klaran,
foho sira seidauk mosu,
Ita Boot Maromak nanis kedas ona;
Ita Boot Maromak nafatin ba nafatin.
3 Ita Boot halo ema fila fali ba rai rahun;
Ita Boot dehan, “Imi ema isin ho raan, fila fali ba rai rahun ba.”
4 Ba Ita Boot, tinan rihun ida
hanesan fali loron ida, liu lalais deit,
hanesan oras balu nebee ema seguransa hein iha tempu kalan.
5 Ita Boot dasa sai tiha ema, sira lakon hanesan mehi;
sira hanesan duut nebee moris iha dadeer-saan.
6 Iha dadeer duut nee tubun buras,
maibee iha lokraik namlaik tiha too maran.
7 Ita Boot nia hirus halo ami atu mohu;
Ita Boot nia laran nakali halo ami tauk teb-tebes.
8 Ita Boot halekar ami nia pekadu iha Ita Boot nia oin;
ami nia sala segredu Ita Boot leno sai mo-moos.
9 Loron ba loron Ita Boot nia hirus taka tomak ami nia moris;
ami nia moris remata ho halerik.
10 Ami nia vida too tinan hitu-nulu deit;
se ami iha forsa karik, bele too walu-nulu.
Bele nunee mos, tinan hirak nee hotu ami hetan susar ho terus;
tempu nee liu lalais deit, depois ami semo lakon tiha.
11 La iha ema ida bele hatene Ita Boot nia hirus nee forsa too iha nebee.
Ita Boot nia laran nakali makaas liu, halo ami hamtauk teb-tebes Ita Boot.
12 Hanorin ami atu hatene sura ami nia loron,
nunee ami bele sai matenek.
13 NAI Maromak, fila mai ba!
Ita Boot atu hirus too bainhira?
Hanoin Ita Boot nia atan sira ba.
14 Iha dadeer-saan, habosu ami ho Ita Boot nia domin rohan-laek,
atu ami bele kanta haksolok ho kontenti iha ami nia moris tomak.
15 Durante tempu naruk Ita Boot halo ami terus;
foo ksolok fali mai ami durante tempu naruk ba;
durante tinan barak ami hetan susar;
halo ami haksolok fali durante tinan barak.
16 Husik Ita Boot nia atan ami haree buat nebee mak Ita Boot halo;
husik ami nia oan sira haree Ita Boot nia furak.
17 Nai ami nia Maromak, hatudu laran diak mai ami;
halo ami nia servisu lao ba oin;
halo ami nia knaar lao ba oin.