91
Hela iha Nai Maromak nia mahon
1 Ema nebee moris hamahon aan iha Maromak Aas Liu,
ema nebee hakmatek iha Maromak Kbiit Nain nia mahon,
2 nia sei hatete ba NAI Maromak,
“Ita Boot mak fatin seguru mai hau, Ita Boot mak lutu haleu hau;
hau nia Maromak, hau konfia Ita Boot.”
3 Tebes duni, Maromak sei salva o
husi lasu nebee kasador sira tau iha dalan,
no husi moras aat nebee hamate ema.
4 Nia sei falun o hodi Nia liras;
o sei hamahon aan iha Nia liras okos;
Nia domin sei haleu o hodi defende o.
5 O sei la tauk buat aat iha kalan;
o sei la tauk rama oan nebee semo iha loron.
6 Moras aat nebee lao iha nakukun laran,
ka moras nebee ameasa ema iha loron manas mos o sei la tauk.
7 Maski ema rihun ida monu iha o nia sorin,
maski ema rihun sanulu monu iha o nia liman loos,
maibee buat ida la kona o.
8 O nia matan sei hateke tuir deit;
o sei haree oinsaa ema aat hetan kastigu.
9 Se o halo NAI Maromak sai o nia fatin seguru,
se o halo Maromak Aas Liu sai o nia hela fatin,
10 entaun buat aat sei la kona o;
dezastre sei la mai besik o nia hela fatin.
11 Tanba Maromak sei haruka Nia anju sira mai kuidadu o
iha o nia moris tomak.
12 Sira sei lolo liman hodi tane o,
atu o nia ain la bele kona fatuk.
13 O sei sama liaun ho samea kobra;
o sei sama hanehan liaun forti ho samea boot.
14 NAI Maromak dehan, “Hau sei salva ema nebee hadomi Hau;
Hau sei proteje ema nebee hatene tuir Hau nia naran.
15 Bainhira nia husu tulun mai Hau, Hau sei hataan;
Hau sei hamutuk ho nia iha susar laran;
Hau sei defende nia no foti aas nia.
16 Hau sei haraik vida naruk ba nia hodi halo nia kontenti;
Hau sei hatudu Hau nia salvasaun ba nia.”