92
Kantiku hahii Nai Maromak
Salmu. Kantiku ba loron Sabadu.
1 Hahii NAI Maromak nee buat diak ida;
Maromak Aas Liu, hananu hahii Ita Boot nia naran nee furak.
2-3 Iha dadeer-saan hau toka viola
hodi foo sai Ita Boot nia domin rohan-laek;
iha kalan hau halo muzika ho viola tali sanulu
hodi deklara katak Ita Boot sempre halo buat nebee loos;
hahii Ita Boot nunee buat furak ida.
4 NAI Maromak, hau kontenti tanba buat nebee Ita Boot halo;
hau hananu haksolok tanba buat nebee Ita Boot nia liman halo tiha ona.
5 NAI, Ita Boot nia servisu furak loos;
Ita Boot nia hanoin klean teb-tebes.
6 Ema sira nebee kakutak mamuk la hatene;
ema beik-teen la kompriende katak,
7 ema aat bele buras lalais hanesan duut;
ema nebee gosta hahalok aat bele moris diak,
maibee too ikus sira sei mohu tinan ba tinan.
8 Maibee NAI Maromak, Ita Boot iha fatin aas tinan ba tinan.
9 Tebes duni NAI,
ema nebee hahalok aat sei halai namkari hotu;
Ita Boot nia inimigu sira sei mate mohu.
10 Ita Boot hasae tiha ona hau nia dikur hanesan karau aman fuik nia dikur;
Ita Boot fui mina morin diak nian ba hau nia leten.
11 Hau nia matan haree ona hau nia inimigu sira monu;
hau nia tilun rona ona hau nia funu baluk sira halai saruntu malu.
12 Ema nebee moris loos sei buras hanesan ramus huun;
sira sei sai forti hanesan ai huun sedru iha rai Líbanu.
13 Sira nee kuda tiha ona iha NAI Maromak nia uma;
sira sei buras iha ita nia Maromak nia uma kreda.
14 Maski sira idade ona mos, sira sei matak ho buras;
sira sei foo fuan ba beibeik.
15 Sira foo sai dehan, “NAI Maromak nee sempre halo buat nebee loos;
Nia mak fatuk lolon boot nebee hau helik ba;
la iha buat aat ida iha Nia.”