94
Nai Maromak mak Justisa Nain
1 NAI Maromak, Ita Boot mak kastigu ema nebee halo buat aat;
Ita Boot mak selu fali buat aat nebee sira halo;
Maromak, hatudu Aan ba!
2 Juis mundu tomak nian, hamriik ba;
selu fali ema foti aan sira tuir buat nebee sira merese hetan.
3 NAI, ema aat sira atu kontenti too bainhira?
Ema aat sira nee sei haklalak too bainhira?
4 Sira muta sai liafuan gaba aan;
ema nebee hahalok aat, sira mesak foti aan deit.
5 NAI, sira sama rahun Ita Boot nia povu;
sira hanehan povu nebee Ita Boot rasik hili.
6 Sira oho feto faluk ho ema lao rai;
sira hakotu oan kiak sira nia vida.
7 Sira dehan, “NAI la haree ida;
Jacó nia Maromak la preokupa.”
8 Imi kakutak mamuk sira iha povu nia leet, rona mai.
Imi ema beik-teen sira nee, bainhira mak imi bele kompriende?
9 Ida nebee kria tilun nee la rona fali ka?
Ida nebee halo matan nee la haree fali ka?
10 Ida nebee foo disiplina ba nasaun jentiu sira la hatene foo kastigu ka?
Ida nebee hanorin ema, Nia konhesimentu la iha fali ka?
11 NAI hatene ema hotu nia hanoin;
Nia konsidera ema nia hanoin buat mamuk ida.
12 NAI Maromak, ema nebee Ita Boot koriji,
ema nebee Ita Boot hanorin kona ba Ita Boot nia lei,
sira nee hetan ksolok.
13 Ita Boot halo sira hakmatek iha tempu susar,
too rai kuak prontu ona ba ema aat sira.
14 Tanba NAI Maromak nunka soe Nia povu;
Nia nunka husik hela povu nebee Nia rasik hili ona.
15 Justisa sei bazeia fali ba lia loos,
no ema nebee laran moos sei moris tuir.
16 See mak sei hamriik defende hau hodi hasoru ema aat?
See mak atu firmi defende hau kontra ema nebee gosta halo aat?
17 Se laos NAI Maromak mak ajuda hau,
la kleur tan hau sei baa hela iha rai kuak nebee la iha lian.
18 NAI, bainhira hau dehan, “Hau nia ain kois,”
Ita Boot nia domin rohan-laek suporta hau.
19 Bainhira hau preokupa buat barak iha hau nia laran,
Ita Boot konsola hau, halo hau haksolok.
20 Ukun nain laran aat nebee uza lei hodi hanehan povu
bele koopera ho Ita Boot ka?
21 Ema aat sira nee kombina malu kontra ema nebee moris loos;
sira foo kastigu mate ba ema nebee laran moos.
22 Maibee NAI sai tiha ona hau nia abrigu;
hau nia Maromak mak fatuk lolon boot nebee hau helik ba.
23 Nia sei kastigu sira tuir buat aat nebee sira halo;
Nia sei oho tiha sira tanba sira nia hahalok aat;
NAI ita nia Maromak sei dasa sai tiha sira.