96
Nai Maromak mak Liurai ho Juis boot
1 Hananu kantiku foun ba NAI Maromak;
mundu tomak, hananu ba NAI.
2 Hananu ba NAI, hahii Nia naran;
loro-loron foo sai Nia salvasaun.
3 Deklara sai ba nasaun hotu-hotu kona ba Nia kbiit;
konta sai ba povu hotu-hotu kona ba buat furak nebee Nia halo tiha ona.
4 NAI Maromak nee boot, Nia serve atu ita hahii;
ema tenki hamtauk Nia liu fali maromak sel-seluk.
5 Tanba nasaun jentiu sira nia maromak la vale buat ida,
maibee NAI mak halo lalehan.
6 Nia hatudu sai Nia naran boot ho Nia naroman nabilan;
Nia kbiit ho Nia furak iha hela Nia fatin santu.
7 Imi nasaun sira hotu, hahii NAI Maromak;
hahii NAI tanba Nia kbiit boot ho forsa.
8 Foti aas NAI nia naran, tanba Nia merese duni;
lori oferta hodi mai iha Nia uma kreda.
9 Adora NAI iha Nia fatin santu ho furak;
mundu tomak, nakdedar iha Nia oin ba.
10 Hatete ba nasaun hotu-hotu dehan,
“NAI Maromak mak Liurai.
Mundu nee hamriik metin no nunka atu muda;
Nia sei tesi lia ba povu hotu-hotu ho lo-loos.”
11 Lalehan, haksolok ba; mundu, kontenti ba;
tasi ho buat hotu iha laran, hasai lian ba;
12 rai maran ho buat hotu nebee iha rai leten, haklalak ba.
Ai huun hotu-hotu iha ai laran sei hananu ho haksolok
13 iha NAI Maromak nia oin
tanba Nia mai,
Nia mai atu foo justisa ba mundu.
Nia sei foo justisa ba mundu ho lo-loos;
Nia tesi povu nia lia tuir Nia lia loos.