97
Nai Maromak mak Ukun Nain boot
1 NAI Maromak mak Liurai;
mundu rai klaran, kontenti ba;
rai sira iha tasi balu, haksolok ba!
2 Kalohan nakukun haleu hela Nia;
Nia ukun nudar Liurai tuir lia loos ho justisa.
3 Ahi lakan iha Nia oin
hodi haan Nia inimigu sira iha fat-fatin.
4 Rai lakan husi Nia leno mundu;
haree nunee, rai nakdedar tiha.
5 Foho sira nabeen iha NAI Maromak nia oin hanesan fali lilin;
iha mundu tomak nia Nai nia prezensa, foho sira nabeen tiha.
6 Lalehan foo sai katak Maromak sempre halo buat nebee loos;
nasaun hotu-hotu haree Nia kbiit boot.
7 Ema hotu nebee adora estatua lulik,
sira nebee gaba aan kona ba buat maten, sira sei moe leet;
maromak hirak nee hotu-hotu tenki hakruuk ba Nia.
8 NAI Maromak, bainhira Ita Boot foo justisa,
ema iha sidade Siaun rona hodi haksolok;
vila hotu-hotu iha rai Judá kontenti.
9 Tanba NAI, Ita Boot mak ukun mundu tomak;
Ita Boot aas liu dook maromak sel-seluk.
10 Imi nebee hadomi NAI Maromak, hakribi buat aat ba,
tanba Nia tau matan ba ema nebee foo laran ba Nia;
Nia hasai sira husi ema aat nia liman laran.
11 Naroman leno ema nebee moris loos;
ksolok leno ema nebee laran moos.
12 Imi sira nebee moris loos, haksolok tanba NAI nia diak;
hahii Nia naran santu ba.