18
Sidade Babilónia rahun tiha ona
1 Hotu tiha hau haree anju ida tan tuun mai husi lalehan. Anju nee nia kbiit boot, i nia nabilan too halo mundu nee sai naroman hotu.
2 Nia koalia ho lian makaas dehan,
“Sidade boot Babilónia rahun tiha ona!
Rahun too rai.
Sidade nee sai tiha ona diabu sira nia hela fatin,
ho espiritu aat hotu-hotu nia subar fatin.
Manu buan ho manu fuik sel-seluk nebee ema hakribi,
halo nia knuuk iha nebaa.
3 Tanba nasaun hotu-hotu iha mundu,
mai hemu nia tua too lanu hodi halo sala seksual tuun-sae,
i liurai hotu-hotu iha mundu
mai halo sala seksual ho nia.
Ema Babilónia kaan atu sosa sasaan di-diak deit,
nunee halo kontratu nain sira husi mundu tomak sai riku.”
4 Depois hau rona tan lian ida husi lalehan dehan nunee:
“Hau nia povu,
sai tiha husi sidade boot nee.
La bele halo tuir nia hahalok aat,
se lae imi mos hetan hotu kastigu hamutuk ho nia.
5 Tanba nia sala butuk aas too ona lalehan,
i Maromak la haluha nia hahalok aat.
6 Nee duni foo terus ba nia
tuir terus nebee mak nia foo ona ba ema seluk,
maibee nia hahalok aat nee,
tenki selu too dala rua.
Uluk nia kahur tua manas foo ba ema seluk hemu,
agora tenki obriga nia hemu tua nebee manas makaas liu dala rua.
7 Uluk nia foti aan liu hodi moris goza deit,
agora tenki foo fali terus ho susar boot liu ba nia.
Feto luroon nee gaba aan dehan,
‘Hau nee liurai feto!
Hau nunka sai feto faluk,
i nunka hatene tristi.’
8 Tanba nee, iha loron ida deit terus boot sei kona nia:
tanis lelir, hamlaha ho mate,
too ahi haan mutuk tiha nia isin.
Tanba Nai Maromak Kbiit Nain
mak foo justisa ba nia nunee.”
9 Bainhira ahi haan nia, liurai sira husi mundu tomak nebee uluk mai halo sala seksual hodi moris goza hamutuk ho nia, sira sei haree ahi suar sae, i tanis lelir ba nia.
10 Sira tauk nia terus nee kona mos sira, entaun sira hamriik husi dook deit hodi dehan,
“Koitadu Babilónia!
Koitadu sidade boot ho forti nee!
Derepenti o hetan kastigu;
iha oras ida deit o rahun tiha ona.”
11 Kontratu nain sira husi mundu tomak mos tanis lelir ba sidade nee, tanba la iha tan ema ida atu sosa sira nia sasaan,
12 sira nia osan mean, osan mutin, fatuk murak, ka morteen perola, sira nia hena mesak furak, sira nia hena diak nian kor mean ho kor kafe. Ema la sosa tan sira nia ai morin, sasaan oi-oin nebee halo husi elefante nia nehan, ai nebee karun, riti, besi ka fatuk marmore.
13 Ema la sosa tan sira nia ai kanela ka temperus oi-oin, sira nia ai been morin ka mina morin oi-oin, sira nia tua, mina azeiti, trigu diak nian, ka trigu musan. La iha tan ema atu sosa sira nia karau, bibi malae ka kuda, sira nia kuda kareta ka sira nia atan.
14 Kontratu nain sira sei dehan ba sidade nee, “Buat hotu-hotu nebee o kaan, mohu tiha ona. O nia riku-soin ho sasaan furak sira nee hotu-hotu nabeen tiha ona, i o sei la hetan tan.”
15 Kontratu nain sira nee riku tiha ona tanba uluk mai faan sira nia sasaan iha sidade nee. Sira hotu sei hamriik husi dook deit, tanba tauk sidade nee nia terus kona mos sira. I sira sei tanis lelir dehan,
16 “Koitadu! Koitadu sidade boot nee!
Uluk o hatais hena mesak furak, kor mean ho kor kafe ho folin karun teb-tebes.
Uluk o enfeita aan ho osan mean, fatuk murak ho morteen perola.
17 Maibee iha oras ida nia laran deit,
o nia riku-soin sira nee mohu tiha hotu.”
Ema sira nebee kaer roo, ema nebee servisu iha roo laran, pasajeiru sira ho mos ema sira nebee mak buka moris iha tasi, sira hotu-hotu mos hamriik husi dook
18 bainhira ahi haan sidade nee. Kuandu sira haree ahi suar sae, sira halerik ho lian makaas dehan, ‘La iha tan sidade seluk hanesan sidade boot ida nee!’
19 Sira raut rai rahun tau ba sira nia ulun hodi hatudu sira nia laran tristi, i tanis lelir dehan,
“Koitadu! Koitadu sidade boot nee!
Ami nebee lori roo ba-mai iha tasi laran halo kontratu,
ami hotu sai riku ona husi o nia riku-soin.
Maibee iha oras ida nia laran deit,
o rahun kedas.”
20 Depois hau rona lian ida dehan,
“Imi nebee moris iha lalehan,
haksolok ba!
Maromak nia povu, apostolu sira ho profeta sira,
haksolok ba!
Tanba Maromak kastigu ona sidade nee,
tuir saida mak uluk nia halo ba imi.”
21 Hotu tiha anju forti ida hiit sae fatuk boot hanesan meza, nia riba tuun ba tasi laran hodi dehan,
“Hanesan nee mos Maromak sei riba tuun sidade boot Babilónia,
i ema sei la haree tan.
22 Iha fatin nee, sei la rona tan ema kanta;
la rona tan ema toka viola ka huu flauta ho korneta.
La iha tan badaen atu servisu tuir ida-idak nia area;
la iha ona ema dulas hare.
23 Ahi-oan sei la foo tan naroman ba sidade nee;
La iha tan festa kazamentu.
Tanba uluk nia kontratu nain sira mak sai ema boot liu iha mundu,
i nia ema uza ai kulit aat hodi bosok nasaun hotu-hotu.
24 Uluk ema Babilónia halo Maromak nia profeta sira ho Nia povu sira seluk raan fakar too mate.
See-see deit mak ema oho iha mundu nee, Babilónia mak lori todan.”