5
Nai Jesus mak iha direitu atu loke livru lulun
Depois hau haree Ida nebee mak tuur iha kadeira ukun nee kaer hela livru lulun ida iha Nia liman loos. Livru lulun nee nia liur-laran hakerek nakonu hotu, i taka metin tiha ho lilin been iha fatin hitu, tau mos karimbu tuir lilin been fatin hitu nee ida-idak. I hau haree anju forti ida husu ho lian makaas dehan, “See mak serve atu loke karimbu fatin iha livru lulun nee hodi loke livru nee?” Maibee la iha ema ida iha lalehan ka iha rai ka iha rai okos mak bele loke livru nee para bele haree saida mak hakerek iha livru laran. Haree nunee, hau tanis tristi loos tanba la iha ema ida mak serve atu loke livru lulun nee para bele haree saida mak hakerek iha laran. Depois ema ida husi katuas lia nain rua-nulu resin haat nee dehan mai hau, “Keta tanis. Haree ba! Liurai David nia Jerasaun ida nebee makaas teb-tebes, ema bolu Nia ‘Liaun husi suku Judá’,* Nia manaan tiha ona. Nunee Nia bele loke karimbu fatin hitu hodi loke livru nee.”
Depois hau haree Bibi Oan ida hamriik hela iha klaran besik kadeira ukun. I animal moris haat ho katuas lia nain rua-nulu resin haat nee, sira hotu haleu kadeira ukun. Bibi Oan nee, hau haree, iha fitar iha Nia isin, hatudu katak uluk ema oho tiha ona. Nia iha dikur hitu ho matan hitu. Matan hitu nee nia signifikadu mak Maromak nia espiritu hitu nebee mak Nia haruka ona ba iha mundu tomak. Bibi Oan nee baa iha Ida nebee mak tuur iha kadeira ukun hodi simu livru lulun nee husi Nia liman loos. Bainhira Bibi Oan simu livru nee, animal moris haat ho katuas lia nain rua-nulu resin haat nee hakneak i hakruuk too rai iha Nia oin. Sira ida-idak kaer buat ida hanesan viola, i kaer mos manko osan mean ida, ai been morin nakonu iha laran. Ai been morin nee mak Maromak nia povu sira nia orasaun. Sira hotu hananu kantiku foun ida hanesan nee:
“Ita Boot mak serve simu livru lulun nee
hodi loke nia karimbu fatin,
tanba ema oho tiha ona Ita Boot.
Hodi Ita Boot nia raan,
Ita Boot sosa kotu ona ema husi suku, lian, povu ho nasaun hotu-hotu
para sai Maromak nia ema.
10 Ita Boot foti sira sai Maromak nia reinu,
i hili sira sai nai lulik para serbi ita nia Maromak.
I sira sei kaer ukun iha mundu.”
11 Depois hau haree tan, iha anju rihun ba rihun, tokon ba tokon. Sira haleu hela kadeira ukun ho mos animal moris haat ho katuas lia nain sira. Hau rona 12 anju sira nee hananu ho lian makaas dehan,
“Bibi Oan nebee mak ema oho tiha ona nee,
Nia mak serve atu ema hotu-hotu respeita, hahii, i foti aas Nia naran.
Tanba Nia kbiit boot liu,
Nia riku teb-tebes,
Nia matenek klean liu,
Nia forsa teb-tebes!”
13 Tuir mai, hau rona tan kriatura hotu-hotu iha lalehan, iha rai, iha rai okos ho mos iha tasi laran, sira hotu hananu hamutuk dehan,
“Ida nebee mak tuur iha kadeira ukun ho mos Bibi Oan,
Sira nee mak ami hahii, respeita i foti aas too tinan ba tinan.
Sira nia kbiit la hotu la remata.”
14 Depois animal haat nee hataan, “Amen, loos duni!” I katuas lia nain rua-nulu resin haat hakneak i hakruuk too rai hodi adora Ida nebee tuur iha kadeira ukun ho mos Bibi Oan.
5:1 Ezequiel 2:9-10; Isaias 29:11 * 5:5 Iha tempu nebaa ema Judeu uza liaun hanesan símbolu ba liurai nebee mak ukun ho diak. “Liaun husi suku Judá” hatudu ba Nai Jesus Kristu. 5:5 Jénesis (Kejadian) 49:9; Isaias 11:1, 10 5:6 Ema Judeu uza numeru hitu hodi hatudu ba buat nebee kompletu i la falta buat ida. Bibi Oan nia dikur hitu hatudu Nia kbiit boot. Nia matan hitu hatudu katak Nia hatene buat hotu-hotu. Espiritu hitu hatudu ba Maromak nia Espiritu Santu. 5:6 Isaias 53:7; Zacarias 4:10 5:8 Ai been morin nee nai lulik sira baibain sunu para halo suar morin. 5:8 Salmus (Mazmur) 141:2 5:9 Salmus (Mazmur) 33:3, 98:1; Isaias 42:10 5:10 Ézodu (Keluaran) 19:6; 1 Pedro 2:5,9; Apokalipse 1:6 5:11 Daniel 7:10