2
1 Hankàñe amo mpikilily
hatsivokarañeo,
o mikitro-draha an-tihi’eo!
Ie berabera andro le mañeneke
kanao am-pità’ iareo ty haozarañe.
2 Mihañe teteke, le mitavañe,
naho anjomba, le minday;
aa le forekekè’ iereo
ty fokontokoñe rekets’ i akiba’ey,
vaho t’indaty naho i lova’ey.
3 Aa le hoe ty nafè’ Iehovà:
Inao, safirieko hekoheko ty fifokoañe toy,
le tsy haha-votso-bozoñ’ ama’e nahareo,
vaho ko mañavelo an-drengevoke;
fa ho san-kankàñe.
4 Amy andro zay le handrazan-drehake
ty ama’o iereo,
naho handala am-pirovetañe ty hoe:
Vata’e rotsake zahay;
novae’e ty anjara’ ondatikoo,
akore ty nanintaha’e amako!
Tsy ho navaha’e o tete’aio? te mone zarae’e.
5 Aa le tsy eo ty hikozozotse talim-panjeheañe an-kitsapak’ ami’ty valobohò’ Iehovà ho azo.
6 Ko mitaroñe, hoe ty taroñe’ iareo;
Tsy hitaroña’iareo o raha zao,
tsy mone ho salareñe.
7 Hoe ty volañeñe ry anjomba’ Iakobe,
Tsy mahaliñe hao t’i Arofo’ Iehovà?
Sata’e hao rezao?
Tsy mahasoa ty mpañavelo an-kavantañañe hao o volakoo?
8 Fe nitroatse ho rafelahy omale ondatikoo; endahe’ areo ty sarimbo reketse ty akanjo’ ondaty mitoañe am-panintsiñañeo,
o mimpoly boak’añ’alio.
9 Ampisitahe’ areo o rakemba’ ondatikoo; songa boak’ añ’anjomba’e soa fihamiñe; asinta’ areo amo keleia’ iareoo kitro-katroke ty engeko.
10 Miongaha! Akia! fa tsy fitofà’ areo ty atoy; i haloera’ey ty maharotsake
am-pandrotsahañe mitivontivoñe.
11 Naho teo ty mpañorike tioke naho vande, nandañitse ami’ty hoe:
Hitaroñe divay naho toake
ama’ areo raho,
ie ty hatao mpilañoñe
am’ondaty retoañe.
12 Toe havoriko rehe, ry Iakobe, ihe iaby;
toe hatontoko ty sengaha’ Israele;
hatraoko hoe añondry
am-piandrazañe ao;
manahake ty lia-raik’ an-golobo’e ao;
higoreongoreoñe ty am’ondatio.
13 Miakatse aolo’ iareo mb’eo
t’i Mpampiboroboñake;
miboroboñake mb’eo iereo,
mivavatse mb’an-dalambey
naho miakatse añe;
vaho miary aolo mb’eo ty Mpanjaka’ iareo, Iehovà ty mpiaolo’ iareo.