3
1 Le hoe raho:
Ehe, mijanjiña ry roandria’ Iakobe,
naho o lohà’ i anjomba’ Israeleio,
tsy inahareo hao ty hahafohiñe ty hatò?
2 Ry mpalain-ty soa, naho mpitea haratiañeo; ry mampikorendake ty holi’ iareo,
naho ty nofotse boak’an-taola’ iareo.
3 Ry mpampibotseke ty nofo’ ondatikoo, mpañolitse iareo, mpampipozake o taola’eo, naho manoritory iareo ho am-balàñeo,
hoe hena an-tsajoa.
4 Hitoreo am’ Iehovà iereo henane zay,
f’ie tsy hanoiñe;
eka, haeta’e am’ iereo ty lahara’e
amy andro zay,
ty amy haloloan-tsata’ iareoy.
5 Hoe ty nafè’ Iehovà
ty amo mpitoky mampandilatse ondatikoo; mikoike ty hoe:
Fierañerañañe,
kanao ahazoa’e ty ho tifarem-pamotsi’e;
fe hentseñe’e aly
ty tsy mampijon-draha am-palie’e ao.
6 Aa le ho haleñe ama’ areo zay,
tsy amañ’aroñaroñe,
naho ho ieñe ama’ areo,
tsy hisikiliañe;
ho tsofots’ andro amo mpitokio,
himoromoroñe am’ iereo te handro.
7 Ho salatse o mpioniñeo,
vaho ho tangòke o mpisikilio;
eka, hanakom-palie iereo,
amy te tsy manoiñe t’i Andrianañahare.
8 Fe mañatsak’ ahy ty haozaran’
Arofo’ Iehovà, naho ty hatò,
vaho ty hafatrarañe,
hitsey am’ Iakobe i fiolà’ey,
naho am’ Israele i hakeo’ey.
9 Ehe, janjiño zao, ry talen’ akiba’ Iakobeo, naho ry talèn’ anjomba’ Israeleo,
ry mpalain-kavantañañeo,
vaho mpañamengoke ze atao zaka-to;
10 Ie mamboatse i Tsione an-dio,
naho Ierosalaime an-katsivokarañe.
11 Mpizaka mipay tambe o mpiaolo’eo;
mipay karama te mañòke o mpisoro’eo, naho mpitoky mpangala falitse o mpitoki’eo;
inao, miato am’ Iehovà iereo,
manao ty hoe:
Tsy añivon-tika hao t’Iehovà?
Toe tsy hifetsahan-kankàñe!
12 Aa le inahareo ro itrabahañe i Tsione hoe tonda,
naho Ierosalaime ho votrim-porompotse,
vaho ty an-tamboho’
i vohi’ i anjombaiy ho ala.