18
1 Mañean-drao ty mirery,
tsambolitio’e ze atao vere-to.
2 Tsy no’ i dagolay ty faharendrehañe,
fa ty mampiboake ty heve’e avao.
3 Ie pok’eo ty tsivokatse,
mipotìtse eo ka ty teratera,
vaho indrezan-kasalarañe ty inje.
4 Rano laleke ty fisaontsim-palie’ ondaty, torahañe mibobobobo
ty figoangoañan-kihitse.
5 Tsy mahasoa te osiheñe ty raty,
hikihoañe ty vañoñe an-jaka.
6 Mikaidraha o soñi’ i dagolao,
naho mikai-tampify ty vava’e.
7 Fiantoa’ i seretsey ty vava’e,
vaho mpamandrike ty fiai’e o soñi’eo.
8 Kenoke mafiry
ty fivolam-pitolom-boetse,
migodoñe mb’añ’ova’ ondaty ao.
9 Rahalahi’ ty mpijoy,
ty mpilesa am-pitoloña’e.
10 Fitalakesañ’abo fatratse
ty tahina’ Iehovà,
milay mb’ama’e ao ty vantañe
vaho onjoneñe tsy takatse.
11 Rova fatratse ty varam-pañaleale,
naho hoe kijoly abo añ’ereñere’e ao.
12 Aolo’ ty ikorovoha’ ondaty
ty fiebotseboran-tro’e,
fe miaolo’ ty hasiñe ty firehañe.
13 Ie manoiñe aolo’ t’ie mitsanoñe:
le hagegea’e naho hasalara’e.
14 Mahafeake hasilofañe ty tro’ ondaty,
fa ia ka ty mahaleo ty fikoretan’ arofo.
15 Mitoha hilala ty tro’ i mahatsikarake,
vaho mañotsohotso hihitse
an-dravembia’e ty mahilala.
16 Anokafan-dalañe
ty ravoravo’ ondaty,
manese aze hiatreke ty bey.
17 Heveren-ko to ty mitalily valoha’e,
ampara’ te pok’eo ty mañody aze.
18 Abala’ ty tora-tsato-piso
ty fifandierañe,
ie mampivike ty mpifanjomotse.
19 Mora ty mandreketse rova fatratse,
ta ty rañetse torifike,
vaho hoe tsotso-bim-pitilik’abo
ty fifanjomorañe.
20 Ty havokaram-palie’ ondaty
ro mahaenem-pisafoa,
o vokam-pivimbi’eo ro maha-anjañe.
21 Manandily ami’ ty haveloñe naho ami’ty havilasy ty fameleke,
hikama amo vokare’eo ze mikoko aze.
22 Mahaonin-kasoa ty tendreke valy,
vaho isohe’ Iehovà.
23 Mihalaly tretrè ty rarake,
fe sotrafe’ ty mpitsikafo.
24 Mianto t’indaty lako rañetse,
fe ao ty ate-hena mipiteke soa
te ami’ty rahalahy.