19
1 Ambone’ ty dagola
aman-tsoñy mengoke,
ty rarake mañavelo an-kahiti’e.
2 Tsy mahasoa ty fiaiñe
te tsy aman-kilala,
mandilatse ty malisa am-pandia.
3 Mampianto ty lia’e ty hanè’ ondaty,
ie mitrevok’ Iehovà an-tro’e.
4 Mpanovon-drañetse o varao,
fe pitso-drañetse t’ie rarake.
5 Tsy ho po-lafa ty mpitalily vilañe,
vaho tsy himolaotse ty mavande.
6 Amam-pandomboke maro ty matarike,
kila mifandrañetse ami’ty mpanolo-ravoravo.
7 Falai’ o rahalahi’e iabio ty rarake—
sandrake t’ie farien-drañe’e!
Heañe’e fe tsy eo.
8 Mpikoko ty tro’e ze mitoha hihitse,
ho tendreke hasoa ty mpangazon-kilala.
9 Tsy ho po-lilo ty mpanao kitomboke,
le hihomake ty mpandañitse.
10 Tsy mañeva ty seretse
ty miaiñ’ añoleñañe,
naho ty ondevo
ty hifehe ana-donake.
11 Mampalaon-kaviñerañe
ty fitsikaraha’ ondatio,
vaho enge’e ty miheve fiolàñe.
12 Manahake ty fitreñan-diona
ty haviñeram-panjaka,
fe hoe mìka añ’ahetse eo ty fañisoha’e.
13 Fianto aman-drae’e ty ajaja votro,
vaho fitsopatsopahañe nainai’e
ty fitreontreon-drakemba.
14 Lovaeñe aman-droae ty vara
naho anjomba,
fe boak’am’ Iehovà ty valy hendre.
15 Mampilañak’ an-droro ty havotroañe,
vaho ho silofen-kerè ty tro’ i tembo.
16 Mahatam-piay ty mahatan-dily,
fe hihomake ty mitsidaredare
ami’ty lia’e.
17 Mampisongo am’ Iehovà
ty mitretre i rarake,
le ho tambeze’e i fatariha’ey.
18 Lilovo o ana’o, kanao mb’e
amam-pitamàñe;
fe ko ilosoran-dafa.
19 Tsy mete tsy liloveñe ty midabadoa;
f’ie haha’o, tsy mahay tsy indrai’o.
20 Mijanjiña fanoroañe,
le miantofa endake,
vaho hahihitse rehe am-para’e.
21 Maro ty safirin-tro’ ondaty,
fe hijadoñe ty famerea’ Iehovà.
22 Ty paiañe ama’ondaty le ty fiferenaiña’e;
Hàmake t’ie rarake ta te remborake.
23 Minday mb’an-kaveloñe
ty fañeveñañe am’ Iehovà;
hiaiñ’añoleñan-dre, tsy ho zoem-boiñe.
24 Alipo’ ty votro am-pinga ao ty taña’e,
fe tsy ahere’e mb’am-bava.
25 Lafao ty mpiteratera,
hianara’ ty seretse fañahy,
fe endaho ty maharendreke,
hitovoñañe ty hilala’e.
26 Ty mampianto rae,
naho ty manao soike aman-drene,
le anadahy manalatse naho mahameñatse.
27 Mijihera tsy hañaoñ’ endake, anake,
le handifihe’o ty tsaran-kilala.
28 Maneratera ty hatò ty mpitalily votro,
vaho lifo-karatiañe ty vava’ o lo-tserekeo.
29 Ampihentseñen-dilo ty mpandrabioñe
naho lafa ty lambosin-dagola.