56
Ho a i Talè, Sabo’ i Davide naho nitsepak’ aze e Gate o nte Pelistio; atao ami’ty feo Deho amy Nonok’ aroañey
1 Tretrezo raho ry Andrianañahare;
fa lialia’ ondatio;
forekeke’e amañ’aly handro am-pohatse.
2 Te handialia ahy lomoñandro
o mivoñoñ’ ahikoo;
amy te maro ty mifandrava amako,
ry Andindimoneñey.
3 Amy andro mampangebahebak’ ahy,
Ihe ty hiatoako,
4 Aman’Andrianañahare
—handrengeako o tsara’eo—
fa iatoako t’i Andrianañahare,
tsy ho hemban-draho;
inoñe ty hanoe’ o nofotseo amako.
5 Embere’ iereo lomoñandro
o fitoloñakoo; fikitrohan-draty avao ty ereñeren-tro’iareo.
6 Mifañosoñe iereo, mietake, mitinoñe ty liako; mandiñe hitsepake ty fiaiko.
7 Ty hatsivokara’ iareo—tsy hipoliotse.
Aretsaho an-kaviñerañe ondatio,
ry Andrianañahare.
8 Fa vinolili’o o firererereakoo;
apoho an-jonjò’o ao
o ranomasokoo;
tsy amy boke’oy hao irezay?
9 Hitolike amy zao o rafelahikoo,
amy andro kanjiekoy,
Zao ty rendreko,
te mpañimb’ ahy t’i Andrianañahare,
10 I Andrianañahare ro andrengeako o tsara’eo,
Iehovà ro añonjonako o saontsi’eo.
11 I Andrianañahare ro fiatoako,
tsy ho hemban-draho,
inoñe ty hanoe’ ondaty amako.
12 Havahako o nifantàkoo,
ry Andrianañahare;
hañenga fañandriañañe ama’o.
13 Amy te vinotso’o ty fiaiko
tsy hikenkañe;
Eka! o tomboko tsy hitsikapy,
ie hijelanjelañe añatrefan’Añahare eo
an-kazavan-kaveloñe.