57
Ho a i Talè, Haja’ i Davide, ie nibioñ’ amy Saoly mb’an-dakato ao ami’ty feo : Ko Rotsahe’o.
1 Tretrezo raho ry Andrianañahare, iferenaiño,
fa Ihe ro fitsoloham-piaiko; eka! an-talinjon’ ela’o ao ty fipalirako, ampara’ te ihelaña’ ty hankàñe.
2 Kanjieko t’i Andrianañahare Abo-tia;
Aman’ Añahare fahatafeterako.
3 Hahitri’e hirik’an-dikerañe ao
ty fandrombahañe ahy,
endaha’e i mandialia ahikoy. Selà
Ho sangitrihen’ Añahare ty fiferenaiña’e naho ty hatò’e.
4 An-teñateñan-diona ao ty fiaiko;
itraofako handre o mpikofòke afoo;
toe o ana’ ondatio,
lefoñe naho ana-pale o famotsi’eo,
fibara masioñe ty famele’iareo.
5 Onjoneñe ambone’ i likerañey rehe,
ry Andrianañahare,
ambone’ ty tane toy iaby ty enge’o.
6 Nikotepe’ iareo harato o liakoo;
mibokobokoke ty fiaiko;
nihalia’ iereo koboñe ty aoloko eo,
f’ie nigodoñe am-po’e ao. Selà
7 Mijadoñe ty troko ry Andrianañahare,
eka, gañe ty troko;
hisabo raho, eka hisabo fandrengeañe.
8 Mivañona, ry engeko!
Mitroara ry kararàke naho marovany,
hampitsekafako ty fanjirik’andro!
9 Hañandriañe Azo raho ry Talè
añivo’ ondatio eo,
ho rengeko an-tsabo
amo kilakila‘ndatio ao.
10 Amy te ra’elahy pak’ an-dindiñe añe
ty fiferenaiña’o;
le pak’an-drahoñe eñe ty hatò’o.
11 Onjoneñe ambonen-dikerañ’eñe rehe
ry Andrianañahare,
ty enge’o ambone’ ty tane bey toy.