4
Tunum ayo tawaal diim kaldaak-ami mafek mafek aket-kup an-bulu ila namti, ali God ami waasi kamalin kaata ko
Luk 9:23-26, Jon 17:14-19, 1Kor 3:1-4,18-21, Fpai 3:18-19, Kol 2:20, Jems 1:27, 3:15, 1Jon 2:15-17
1 Kipni weng aal diki-bam ale, din-bom ken-umbip kaami miit kaa, kanim kalan ni? Ibi tit itam-laamin aa, aket atul tabemin kaata nuu-bamdipla, weng diki-bam, dinan-kulii-tabe-bam ken-umbip te! Kaa dok kata naa kalolip:
2 Kibi mafek mafek uyo ma kuluulum o, kaliwa, liip dinim o, kalbip-kup, tunum yemin kaami aket uyo fukun-bam, aa mafek mafek sang bokoyip: Daa yo, kalip ilmi mafek mafek kalan tuluya, aket atul uyo tiltam tulule, weng aal diki-bam ale, dinan-kulii-tabe-bam ken-umbip o. Kaali ibi mafek mafek sang kaa God ami dik-dakalin dinim ke-bilipla kemin, God ali kukaayin disa ken-umba.
3 Mafek mafek sang dik-daalip uyo, ibi aket kaali alep fukun-bamdipla, iltipni mafek mafek sang kaata-kup, dik-dakaan-biliwa kemin, kukaayin dinim ken-umba te!
4 Ibi tawaal diim kaldaak-ami mafek mafek aket kaata-kup yan-bulula ilip namti, God ami daang ukola yang ban-ilomdip waasi kamaala-yaabip kemin, kaa utamip o? Kawanita tawaal diim kaldaak-ami mafek mafek aket aalu ilon o, kala namti, ali God ami waasi kela no.
5 Baibel tem uyo boko-lomdu: God ata tunum numi sinik ayo dabaaya tildak tunum numi iipyak tem un-ilom bombe kaali, God kaa atul-atul-bamda tiin mosa no, kalsu. Kemin, weng kalawuuli kasen-fakamin disa.
6 Kemin, God ali aket balili-kalin dukum kukaayin-bam ilin kemin, Baibel tem dolsip uyo boko-lomdu:
God ali fuut tabin tunum iyo yim-baak tabi-lom ale, tunum dak-diiba bom ilin ita, aket bilili-kalin uyo kukaayila-yaaba no,
kalsu.
7 Kemin, ipkal iltipni angtiil so, sinik so, alik iyo God ami koliwa, alta tiin molak o. Ibi Setaan Tunum Mafak ami tal oko-takaya talaba ayo, Daa yo, kala titil-fak-daaliwa, Setaan ayo ukadaa unokoma no.
8 Ibi din God ami mepso unipla, God akal tildang ipni mepso tala kelin o, kala-somla ko. Ibi ban kemin tunum kemin, ibi tunum ami sikil diingna tambal ke-laabu ultap ke-lomdip ban wakamin uyo kambola-somdipla, kukup tambal kaata-kup kutal-fukulin o. Ale, ibi aket alep fukunin tunum kemin, kipni aket fukunin mafak uyo kukan-tiilipya, dotulip tambal keluk o, kala-somya ko.
9 Iltipni kukup mafak kaami kalan uyo aket uluum tabeyulula ama-bamdiwa yo, kala-somla kemin, ipni dakmin-bamdip aban-diibip uyo kambolalip fal-siki-lom, iltipni kukup mafak kebip kaami kalan uyo ama-bam ale, fiyaap duumin uyo kela-lomdip, fal-siki-lom aket uluum kemin o.
10 Ibi God ami minlo tem kawu bilili-kup kala-lomdip bom-bilipla, bii-lom kawu God akal yim-folak o, kala-somla ko.
Kap-tunum kusal imi ita-fiimin weng uyo bakayin disa yo, kala Jems ata kanum bokosa kaata ko
Mat 7:1-5, Luk 6:37-42, Rom 14:1-12
11 Nak-tunum kusal kipyo! Ibi kap-tunum kusal kiili, ita-fiimin weng uyo bakaya una-tala-kemin daa yo. Kawanta ap-tunum ami atafiimin weng uyo bakaan-bamda dap-kuku-bam atafiima namti, kaali God ami weng o, kala Lo kuka-daasa umi um-kuku-bam atafiimin weng uyo binala yak Lo umi diim abebu no. Kabi atafiimin weng uyo Lo umi bakawap namti, kabi weng uyo weng san-kaamin kaami kukup uyo kela akaawa-lomdap kapta kapta kelapla, Lo uyo kabaak banokomu.
12 God maakup ata-kup Lo kaa kutiisa le, ata-kup unang tunum iyo yam-kuku-bam itafii-bamda yam-bak-saanokoma. Kemin, alalta-kup tunum ayo dabuulokoma, aa dap-mafak-daalokoma kemin, kapni kap-tunum atafii-bam dabak-saanokoma kaa kapni mafek mafek disa.
Jems ami boko-lomda: Iltipni win kufu-bam ale tong kaa bakamin dinim o, kalsa kaata ko
Luk 12:19-20,47, 1Tim 6:9-10,17
13 Tunum iip maakup maakup ibi baka-bamdip bokolip ko: Kamala e, am sabi e, uyo din abip dukum kaptam ban-ilomdupla, wan-fakan-tal-une-bulup bom bii, wasital maakup ma duk-duu-lomdupla, moni yaapkan kaamum o, ken-umbip.
14 Kiwo! Kibi kanolin ok kaami kuluu-lom okok-bam ilin kaami weng kaa bakamin daa kayi! Numi tal-unemin kaa kalok nolin tap i? Numi ilin so, tal-unemin so, kiili kutim malang ibin dukum uyo tiltam taba-lomdu ilanin tap ke-lom disa ke-yaabu ultap kemin, nuli mafek mafek sabi tiltam talokomu kaa utabup disa yo.
15 Kanola ibi boko-lom: Dukum almi san kemin, alta bokoya-lomda: Ok kalaata okok kemin o, kala kula kuno tabuulalup; aa, ok kusnum kaata tabuulin o, kala kulaali kuno fukulamup kalokin. Lale,
16 ibi kela-silip kemin, fuut kuyak daa-bom iltipni win kaata-kup kufu-bam ale, iltipni tong-kup bakamin kaali, kukup mafak o.
17 Uyo ipkal utamin, kawanta ma utamala, Kanu-mokomi kaali tambal o kalba. Yale, kaa kambola-lom ayo kanumin disa kela namti, ali ban ke-bamdala, kukup mafak ken-umba no.