21
Yesus ami kamokim dukum king alaltap kela Jerusalam unsa kaami sang kaata ko
Mak 11:1-11, Luk 19:28-40, Jon 12:12-19
1 Yesus daang bakaalin tunum nikil iyo tal abip dukum Jerusalam mepso tal Oliv Tikiin umi abip ma Betfage kaba talom ale, Yesus ayo almi daang bakaalin alep ma isiik fokoli uniwa yo, kala-lomda,
2-3 weng asiik duuya bokola: Ibi yak aba tam abip utafiibup kaptam tam ulip, Dongki man kasaa so, awak so, awaat iyo sok im-diilip bilip kala itam-ilom, abiltap ita-mokomip ko. Dongki awaat imi sok ayo, baa-lomdip awaat imbiilip nami bi tilip yo! Alep kanum umbaa-silipla tunum ma itama yi, Kanum talabip kalala itam dik-daaya namti, ipsiik bokola-lom: I, numi kamokim alalta kulii tilin o yakaya tulup. Kemin, kabi abiltap-siik dongki awaat kamboyilap imbi unum o, kala bokolalip kulii tilin o, kala kanum bokoya im-baala unip ko.
4-5 Kemin, sawaayak kawu God ami profet ma ayo God ami Sukon Tem kabaku dola kutii boko-lom:
Ibi din abip dukum Saiyon o, kala Jerusalam kaptam ban-ilomdip abip kasel imi bokoya-lom: Di utamin a! kipni kamokim king ali kipni fanang talaba kemin ale, ali win soyap ami talemin tap ke-lomda talaba dinim. Ali dik-diiba bomdala dongki man kasaa ami daang kun diim tiinda talaba no, kalin o,
kalsa. Namti kulaa ami weng bokosa uyo fan tiltam tabon e, kem-talabu ko.
6 Kulaa, Yesus ami daang bakaalin tunum alep iyo Yesus ami weng kaata-kup weng sandipya,
7 yak aba din dongki awak umi sok uyo baawa-lom, man awaat imbii tal Yesus koliwa, ilmi ilim saket ayo dilduu kutam dongki man kasaa ami daang kun diim kabaaku tabeliple, Yesus ayo tam dongki daang kun diim kabaaku tiinda una-balala,
8 unang tunum yaapkan imi aket fukunin uyo, king ami tala-bala fiyaap duumin kaami kukup ayo kanumin kemin, Yesus ayo kala liip talaba kemin, liip ayo tambal-kup ma dotuluwa tal-unak o, kala-lomdip ilimi ilim malo ayo dilela kulaak liip kawu taben-balale, malo ma ita liip mepso ami as tang kon bapliim so fakela kulii-talaba daak Yesus ami tal-unokoma taben-bala kebi kuteliwa, dongki ayo ilim so, as bapliim so, ami tip diim liip unak.
9 Kanum una-balala, unang tunum yaapkan iyo biki-kutii bon tem una-balale, unang tunum yaapkan malo ma ita daang tem lo kaptoowu kelip Yesus ata iipyak tem kawu una-bala ke-bamdiwa, fiyaap duumin dukum ke-bam ale, dukum-kup naan-bamdip: Nuli King Devit ami man loop kalaami win uyo kuluu kufolum o, kal-bom ale, Yesus kalawaali God Dukum ami win diim o, kalala talaba kemin, God ata kukup tangbal-kup kukaayim-balaya yo, kal-bomdip God ami win sakbaalim dukum ayo kuluu kufon-bamdup fiyaap duumum o, kemip ko.
10 Kanum una-biliwa, Yesus ayo yak aba din Jerusalam kaptam banale, abip kasel iyo alik atam-ilomdip alik maakup fanang alik tam baneyilula, fiyaap duu-bamdip yakal taba dik-daala una-tala-ke-bamdiwa bokolip ko: Kaa kawanta ni? kemipla,
11 unang tunum Yesus aso talabip ita aptum kusal imi bokoyip ko: Kaaye? kaali God ami profet o kala, God ami weng ku-fatap-dakamin tunum Yesus, ali Provins Galili umi abip Nasaret kaptam kayak tunum o, yikip ko.
Yesus ami din lotu am diilim mafek mafek saanin tunum imi fotabasa kaami sang kaata ko
Mak 11:15-19, Luk 19:45-48, Jon 2:13-22
12 Kemin, Yesus ayo yak aba din lotu am diilim din ula, Tunum iyo mafek mafek God ami kukaalin uyo kutal aba tam lotu am tiilip uyo kukaayim-biliple, saanbip kala kala-lom tam-ilomda, tunum alik mafek mafek kulii-talaba tam tiilip so, tunum kusnum tal saanbip so, iyo alik fotabamna sak funbi, tuumon kola una-tala-kemin tunum imi tebol ayo dak-siki ku kabaak moyale, awon abim God ami kukaalin umi kulii-tal tiilip saanin tunum imi abiin baan uyo dikela kulaaya yang aba kebi kutiiya-lom
13 bokoya ko: Sawaayak kawu God ayo Sukon Tem dolsip kabak boko-lomda:
Nami am kaltam-ali beten kemin am o, kalokomip o,
kalsa kaa, ibi God ami weng kulaa utamsip o kalsu. Yale, ibi ami weng kuuli, kuyang saak tela-lom God ami am uyo ku-mafak-dakanbip o. Am kaltam-ali ipni wan saan-bam kaptum kusal imi moni yukut inin am kelu kewinsip o, kala kanum bokoya ko.
14 Yesus ayo kano lotu am diilim kaptamu bom-balaya, unang tunum tiin mafak so, yawiit so, iyo Yesus ami bombe kawu din atam-yaa-bilip, yam-talal kaa-balala,
15 awem tunum pris o kebip imi kamok kamok so, lo utamsip tunum so, iyo Yesus ami kukup kusnum kanuba uyo utabip-kup, weng saniwa yi, Man katip katip iyo lotu am diilim kaltamu naan-bamdip bokolip ko: Kalawaali King Devit ami man loop. Kemin, ami win uta kufolum o, kalbip kala kala-lomdip tunum awem imi kamok kamok so, lo utamsip tunum so, ili Yesus ami aket atul kukaan-bam ale,
16 bokolip ko: Kapyo, kabi kanolin weng mafak bakabip uyo weng selap yoko? akipla Yesus ayo bokoya-lom: Kiimi weng ayo weng seli. Kemin, ili kukup mafak kebip disa. Ili God ami Sukon Tem bokosu kaata nuubip kaa boko-lomdu:
God kapta man katip katip so, man unaak so, iyo kukuyilapla, kapni fiyaap duu-bam ale, kapni win uyo kufup-tan-bam ken-umbip o,
kalsu. Kemin, ibi God ami weng kaa lukuuyinsu yoko? kala bokoyilala,
17 kamok kamok iyo lotu am diilim dukum kaptamu kamboyila tiltam daak abip abale, yak aba din abip Betani kaptamu akana ko.
Yesus ayo weng-kup bakam-salale, as fik datsu kaami sang kaata ko
Mak 11:12-14,20-24, Mat 17:20, 1Kor 13:2
18 Yesus aye, daang bakaalin tunum aa, nikil iyo Betani silip sintam kutim malang tem Betani ayo kela Jerusalam unum o, kalalip un-bom ale, Yesus ayo ol-tinap kelula,
19 utama yi, As fik al ma liip balang tem kawu tolsu kalale, yak aba yang fik lap ayo ma duk-duu ina-somdila yo, kala yang ulaya, Fik lap ayo ma abuulin dinim kon-kup be kalale, bokola ko: As kalawaali lap ayo ma asuk abuu-mokomu dinim o, kem-salale, kuyaku as fik miit ayo maak fak-daalin tap datnu ko.
20 Kanolaya, daang bakaalin tunum iyo utamdiwa aket alik tam baneyilula, bokolip ko: Nakayi! fik miit kaali, dok kano-lom abiltap-siik datnu ni? kemiwa,
21 Yesus ayo imi weng uyo bokoyila ko: Nami weng kalawuuli lukuuya-yaamin daa; ti kuyak iltipni aket tem daalalip kayi! God ami aket fukunap uyo aket alep fukunin daa. Talalu aket fukun daa; God ami kaata kanuman o, kalba, ayo yaap dong dokop-na kanu-mokomi kalokomap uyo kapkal yaap yak nami as kanoli ultap kaa kanolokomap. Kanola ti kalbi boko-lomdap: God, kabi yak amdu kulaa bildaa dabaalap yol ok kumun tem unak a! kalokomap uyo, fan kapni dik-daalap kaa God ali kanop-tokoma no.
22 Kapkal aket fukunawa, God ali ti dong dokop-na ami kukup kaa kanolokomi no! kalokomap namti, kabi beten ke dik-daalokomap kaata, ali fan kanop-tokoma no, yaka ko.
Kamok kamok iyo Yesus ami dik-daala-lomdip: Kabi kawanami win diim okok kala nuubap yoko? kalsip kaami sang kaata ko
Mak 11:27-33, Luk 20:1-8
23 Yesus ayo yak aba tam Jerusalam aba-lom lotu am diilim kaami daam tem kawu tam-ilomda God ami weng kaata, unang tunum imi kukuyin-balaya, pris awem tunum imi kamok kamok sole, Juda kayaak imi kamok kamok iso, iyo tal Yesus ayo dik-daalip ko: Kapyo, kabi kawanami win diim kaata, kufo-bamdap yak kanolin kukup kala kanun-umbap i? Kabi kanta tam-baala tal-ilomdap kanolin kukup kala kanum-solap yoko? Nuyo bokoyawa, utamum o, akiwale,
24 Yesus asiik imi weng an-anung-daa bokoya-lomda: Na, nasiik weng ma kipni dik-daayokomi. Kemin, ibi nami weng kalu maan tiip-nip namti, aa nakal kipni weng uyo maan tiiyokomi.
25 Oksam ukayin tunum Jon Baptis ali kawanami win diim kaata, unang tunum iyo oksam ukayinsa ni? God ami win diim kanum-soma ne? tawaal diim kaldaak-ami tunum imi win diim kanumsa yoko? Nami weng kala dik-daayi kaata, maan tiip-niwa yo, kalale, ilmi-kup bokola una-tala-ke-bam bokolip: Kwin! nokol kaa kanimin o, kalokomup i? kemsile, Nuli boko-lom: God ami win diim kaata, kanumsa no, kalokomup namti, ali bokoya-lomda: Ibi utamiwa, God ami win diim kanumsa kalip namti, ibi kanimin o, kala, Jon ali fan God ami weng kaata tituun bakayimba, kemsip disa ema? kalokoma. Kemin, kela boko-lomdup:
26 Tawaal diim kalawaami tunum ami win diim kanumsa no, kalokomup kaata, unang tunum yaapkan kalawii aket fukuniwa yi, Kaa fan Jon ali God ami profet o, kala weng ku-fatap-daa bakayin tunum o, kalalip nuyo aket atul kuya yelalip o, kala nuli suunbup o, kala-lom
27 Yesus ami ibokola-lomdip: Kaa kanta Jon kaa bokolaya, ali taba-lom unang tunum kii oksam ukayinsa kalalup utabup dinim o, akiwale, Yesus asiik bokoya-lomda: Nakal ti kanolin kemin kawanami win diim kaata, kanolin kukup kaa kanun-umbi uyo bokoyokomi disa yo! yaka ko.
Yesus ami tunum ma kaami man tunum alep imi sang faldak-tii weng do bokosa kaami sang kaata ko
28 Yesus ayo kamok kamok imi bokoyila ko: Nami faldak-tiimin weng kala bokolokomi kalaali, talalu weng san-ilom ale, kawu kalok nolin aket fukunin uta ma tildang tulu kala-somdiwa kawu, kipkal bokop-nin o. Tunum ma ayo man tunum man alep kemin am ma daanule, man diil ami bokola ko: Nalmi man diil kapyo, kamala uyo din wain lang kaata dikiman o, kala bokolale,
29 man asiik aalap ami bokola: Nali keli no, kala biile, asuk aket fal-sikiba-kup; din wain lang dikima ko.
30 Kulaa, aalap ayo din man niing afung ayo atamda asuk ti fik ami bokola tap ke bokola ko. Bokolale, man asiik aalap ami weng bokola uyo bokola ko: Nata din dikimon o kala; katale, ali unoma disa, kelase no.
31 Kulaata nali weng ma dik-daayokomi kemin, weng san ilawa! Alap kiili niing ata ne? fik ata ne? ilmi aalap ami weng kaa weng san-silip yoko? yakala, kamok kamok isiik bokola-lomdip: Daa, fik ata aalap ami weng ayo weng selase no, akiwa, Yesus ayo bokoya ko: Nami weng kala bokoyokomi kalaali, dotu weng san iliwa! Tunum unang mafak ili fik ami kanose tap kanolokomip kaayo, takis kaamin tunum mafak iso, yak sadikimin unang so, ili ilmi aket kaata fal-siki-lomdip ita ita keliwa, kamok kamok ipta kulaak banipya, abiltap tiltam God ami miit tem talokomip. Kemin ale, aa ibi yi? Ibi tiltam God ami miit tem kaa tiltam talokomip e disa?
32 Kanolin kemin, siin kaali oksam ukayin tunum Jon Baptis ali tal ipni kukuyin-bam bokoya-lom: Ibi tiltam God ami miit tem talemin kaami liip kaa kano-somdiwa yo, kemsa. Lale, ibi ami weng kaa ma weng san-kaamsip dinim te! Takis kaamin tunum mafak kiiso, sadikimin unang so, ita Jon ami weng uyo weng san-somdiwa, imi aket ayo fal-siki-lomdip ilmi kukup mafak nuubip kulu kewa-lom tildang God ami lak kaata duulip kala, kalalip ibi itam-silip. Katale, ibi Jon ami weng uyo weng san kipni aket ayo fal-siki-lom ililtap kelin disa ke-lomdip, ipni kukup mafak nuubip uyo kela-lomdip, God ami lak kaata duulin dinim o, kala Yesus ayo kamok kamok imi kanum bakayila ko.
Yesus ami faldak wain lang tiin saanin tunum imi sang bakayin-bisa kaami sang kaata ko
Mak 12:1-12, Luk 20:9-19
33 Yesus ayo asuk kamok kamok imi bokoyila ko: Nali weng kusnum ma bokoyokomi kemin, ibi talalu weng san iliwa! Tunum ma almi wain lang ma talalu kutii-lomda uti foko kela wain san ayo dikiba-kup; tuum tem kala-lomdipla, ok liip unemin dotu sok lap iyo fokolip daak uniple, yaan ta talela kutiibip-kup, ok bina-unemin uyo dotu kutii kela, lang kaptam tiin mo bom ilin tunum ami am ayo bitam asal kaptamu de kambolale, tunum wain lang tiin molokomip iyo ulela-lom bokoyila ko: Wain lap abuu tii-mokoma kaali, dakabi kutii kela tak-nuubi ok ayo laabi kutiiliwa, kaptum kusal ita tal molipla, kipta sisol ayo kuluu-lom anung ma iltipni kuluubip-kup; nakal anung kuluu kulaap-nip din unemak o, kala kamboya bilin samaan kawu una.
34 Kemin, wain lap abuumin umi am uyo daanula, tiin-saanin tunum iyo wain lap iyo dakamsi kutii kela yak ok ayo tuk-nuu-bam ok kaa laabi kutiilipla, aptum kusal iyo kuyip ita moliwa, kulaa wain lang kayaak ayo almi ok fukulin tunum iyo yim-baala tal wain lang tiin molin tunum imi bokoya-lom: Numi kamokim ami wain lap imi ok kaami sisol anung ata kuyilipla, nulmi kamokim ami kulela unum o, yikiwale,
35 kulaa wain lang tiin molin tunum iyo weng sandiwa, yak kamokim ami okok kemin tunum iyo yim-tal-fuku-lomdip, ma ata disa kiin waal biwakabi kelale, ma ata olso aalip taan-som, ma ata tuum ta binalip yak tunum ami dabom baken-bilip bom bii saakna keyip ko.
36 Kanolip kala kalalaya, kamokim ayo ok fukulin tunum iyo yaapkan iyo im-baala din wain lang tiin saanin tunum imi fanang din itamiwale, tiin molin iyo asuk kamasi okok kemin tunum imi tal itamip kanola yan-silip tap kuno yakal anulip taan kelip kala-somdala,
37 kamokim ayo weng sandala aket fukuna ko: Nali nalmi Man kalawaali dabaali din una namti, ali aalip taanokoma dinim. Ami win kaata kufon-bam ale, ami weng kaata-kup weng sanokomip o, kala kalale, mafiing diim kulaata, almi man ayo dabaala din wain lang tiin mo ilin imi bilip una.
38 Lale, din una wain lang tiin molin tunum iyo atam-ilomdip kulaa nikil iyo ilmi bokola una-tala-ke-lomdip bokolip: Kulawaali ti wain lang kayaak almi man kemin, bom bii-lom aalap ami taanokoma ayo, alalta aalap ami mafek mafek kaali, alik tiin mo-lom almi alik ke-lokoma kemin, aalupla taanala, wain lang kaltam ayo nulmi alik keyuk o, kala-lomdip,
39 yak man ayo dap-tal fuku-lom sisii dilili dibii tam uti yal foko tam daak saaklo kabaaku aalip taana kayi! kala Yesus ayo weng do ayo kanum bokoya ko.
40 Kemin, Yesus ayo dik-daaya-lomda: Kipyo, wain lang kayaak ami asuk talokoma kaa, ali wain lang tiin molin kii, kanimin ma noyokoma ni? Kipni aket fukunbip kaali kanimin o, kalbip? yaka-lomda Yesus ayo dik-daayilale,
41 kulaa kamok kamok iyo Yesus ami weng uyo maan telip ko: Kamokim ayo taba tunum mafak yam iyo yebi angtiil yol daka-bam saaknipla kawu, tiin saanin tunum kusnum iyo ulelnala ita tiltam ami wain lang kaa tiin mo-biliwa bii suunkup wain ayo abuulu kalale, wain lap wok ayo laabi aptum kusal imi kuyip ita molipla, kulaa wain lang kayaak ata imi sisol anung ayo suunkup tambal kukaalokomip o, kala kamok kamok iyo kanum bokolip ko.
42 Kemin, Yesus ayo bokoyila ko: Tiin molin tunum taba lang abip kayaak ami man ayo aalip taanba kiili, siin sawaayak tunum kusnum imi kukup kanu-bisip ililtap te! kala God ami Sukon Tem kaali, imi sang kaata kanum boko-lomdu:
Ok fukulin tunum ili am kaa dina-bam tiyak daaliwa, Am kun ma kaali mafak kala, kala-lomdip kuluu kulaalip yak balang diim kabang abamna. Katale, kamokim ali am kun kaa atam-ilomda, Kwin! kaali ti tambal kemin am duwokop kelak o, kala-lomda am kun kaali, asuk dibii tildak dap-molaya ayo tangbal mokso ke tolnu ko. Kemin, kamokim ami kanola kulaa God alalta kemin, nuli utamuwa yi, Ami kanola kaa fan tangbal kela kayi! kala-sulup o,
kalsu. Kemin, ibi kuyak tik-tii-bam utamsip. Yale, kanimin o, kalaliwa kaami miit uyo talalu utamsip disa yoko?
43 Kibi nami weng kala bokolokomi uyo talalu weng san iliwa. Siin kaali, God ali Juda kayaak kipni win kaa nami unang tunum o, kala-lomda, imbii tiltam nalmi miit tem daalon o, kemsa. Lale, kamala kalaali, God ali utamala, Ibi daang ukup-nip kalalaya, God asiik ibi daang ukuya-lomda, yak unang tunum kusnum kayak kayak ita ulelba-kup bokoyila ko: Ibi ti titil-fak-daa nami weng kuu weng san kutal-fukulip namti, nasiik ibi imbii tiltam nalmi miit tem daalokomi no, keba no.
44 [Aa, kuno ti am kun awak dukum ma bombuu. La, dok nolin tunum ata kutal daak am kun diim kaa daala namti, ayo dap-mafak-daalokoma le, am kun uyo dik-tam-daa tildaak tunum kaami angtiil diim abam-nokomu ayo, atin tunum dabuu dabaak molula, atin ti dap-mafak-daalokoma no, kala Yesus ayo almi sang kaata, faldak am kun umi diim kabak tii-lomda bakaya ko.]
45 Kanola pris o, kala awem tunum imi kamok kamok so, Falosi so, iyo Yesus ami faldak-tiimin weng alep kiili, weng san-somdipla utamiwa yi, Kuyak nulmi sang kaata bakayimba kala kalalipla,
46 sok delum o, kalip. Lale, utamipla, Unang tunum yaapkan ili aket fukun-bamdip, Yi, Yesus kaali God ami profet o, kalaliwa, fiyaap don-bilip kala kalalipya, kamok kamok iyo unang tunum imi atul uta itam-suun-daa-lom sok dedulin dinim kelip ko.