Li̠pa̠xúhu Xtama̠catzi̠ní̠n
San Marcos
Xli̠pu̠lacta̠ti Evangelios hua̠ntu̠ tali̠chuhui̠nán xlatáma̠t Quimpu̠chinacán Jesucristo, huá u̠má xla San Marcos xli̠ca̠na pi̠ ni̠ lhu̠hua tachuhuí̠n hua̠ntu̠ li̠chuhui̠nán, ma̠squi xli̠ca̠na pi̠ ni̠ luu lhu̠hua hua̠ntu̠ xlá li̠chuhui̠nán, pero huata huá a̠tzinú maká̠n la̠ta tzokcani̠t, ni̠ xachuná hua̠ntu̠ tatzokli Mateo, Lucas y Juan.
Nac u̠má xtachuhuí̠n San Marcos ma̠siyuy Jesús cumu la̠ cha̠tum chixcú hua̠nti̠ luu lakati̠y xtascújut y ni̠ tzinú jaxa hasta tla̠n nama̠kantaxti̠ko̠y hua̠ntu̠ xlakaya̠huacani̠t. Xlá na̠ luu lacasquín pi̠ nacatzi̠yá̠hu pi̠ hasta mismo Jesús xlá ma̠n xli̠chuhui̠nancán pi̠ huá Xatalacsacni Chixcú y huá xli̠mini̠t la̠qui̠ nani̠y caj quimpa̠lacatacán y chuná naxoko̠nún quintala̠kalhi̠ncán.
Ni̠ li̠chuhui̠nán ni̠nco̠cxni lacáchilh Jesús, o lácu luu qui̠táxtulh acxni̠ lacáchilh nac ca̠quilhtamacú, huata u̠má li̠kalhtahuaka xma̠n li̠chuhui̠nán xlatáma̠t Jesús y lácu xca̠ma̠tla̠nti̠y cristianos y xtlahuay lhu̠hua laclanca tascújut, xa̠hua lácu makní̠calh y lacastacuánalh nac ca̠li̠ní̠n.
1
Juan Bautista akchuhui̠nán nac desierto
(Mateo 3.1‑12; Lucas 3.1‑18; Juan 1.19‑28)
1 Eé libro li̠chuhui̠nán hua̠ntu̠ li̠kantáxtulh xlatáma̠t Jesucristo Xkahuasa Dios la̠ta lácu milh ma̠sta̠y laktáxtut.
2 Chuná li̠tzúculh cumu la̠ profeta Isaías xamaká̠n quilhtamacú titzóknulh xpa̠lacata, chiné xuán:
Cmacá̠n quiakchuhui̠ná napu̠laniyá̠n
la̠qui̠ naca̠xtlahuaniyá̠n mintiji.
3 Caj lá̠mpara tícu quilhmima̠chá nac desierto antaní ni̠ti̠cu lama cristianos y chiné huán:
“Caca̠xtlahuanítit tiji antanícu luu tla̠n nalacmín Quimpu̠chinacán;
cama̠xtunítit kantum tiji ni̠ma̠ statua.”
4 Pus chuná timinchitá Juan Bautista xca̠akmunuma cristianos nac desierto, xca̠huaniy pi̠ catalakpáli̠lh xali̠xcájnit xtapuhua̠ncán y natataakmunuy la̠qui̠ Dios naca̠ma̠tzanke̠naniy xtala̠kalhi̠ncán.
5 Xtamín takaxmatniy cristianos hua̠nti̠ xtalamá̠nalh nac Judea, chu xalac Jerusalén; y acxni̠ xlacán xtali̠ta̠yay xali̠xcájnit xlatama̠tcán, maktum xtahuán pi̠ xli̠ca̠na xtalakpali̠putún, Juan xca̠akmunuy nac kalhtu̠choko Jordán.
6 Hua̠ntu̠ clhaka̠y Juan xli̠tlahuani̠t xmacchíxit camello, xtampu̠laktahuilay kantum cinturón xla xu̠hua, y xli̠hua̠yán lactzu xtuqui chu táxca̠t hua̠ntu̠ xmaclay nac ca̠quihuí̠n.
7 Acxni̠ xca̠ma̠kalhchuhui̠ni̠y cristianos chiné xca̠huaniy:
—Niaj maka̠s quilhtamacú mima a̠cha̠tum ti̠ a̠tzinú lanca xlacatzúcut hua̠nti̠ ni̠para tzinú cmakalakchá̠n nacli̠tanu̠y cumu la̠ xtasa̠cua nacxcutniy xacorrea xtatu̠nú̠n.
8 Aquit caj chúchut cca̠liakmununi̠tán, pero xlá naca̠liakmunuyá̠n xli̠tlihueke Espíritu Santo.
Akmunucán Jesús
(Mateo 3.13‑17; Lucas 3.21‑22)
9 Ni̠ li̠maka̠s quilhtamacú Jesús táca̠xli nac xca̠chiquí̠n Nazaret hua̠ntu̠ huí nac xmunicipio Galilea, y Juan akmúnulh nac xakalhtu̠choko Jordán.
10 Acxni̠ tacutli nac chúchut Jesús úcxilhli pi̠ taláqui̠lh akapú̠n y Espíritu Santo xta̠ctama̠chi nac xokspú̠n caj la̠ actzu paloma.
11 Na̠ acxnitiyá takáxmatli aktum tachuhuí̠n minchá nac akapú̠n, chiné huánilh:
—Huix Quinkahuasa ti̠ luu cpa̠xqui̠y, luu cli̠pa̠xuhuay caj mimpa̠lacata.
Akskahuiní tzaksay Jesús
(Mateo 4.1‑11; Lucas 4.1‑13)
12 Acxnituncán la̠ ta̠kmunuko̠lh, a̠má Espíritu Santo le̠lh nac desierto antaní ni̠ti̠cu anán cristianos.
13 Antá xlama̠chá Jesús ti̠puxám quilhtamacú sacstu, xma̠n huá quitzistancá̠n xala ca̠quihuí̠n xtata̠lamá̠nalh. Akskahuiní na̠ antá xma̠tlahui̠putún tala̠kalhí̠n pero Jesús makatlájalh, y acali̠stá̠n támilh xángeles Dios, tamaktákalhli.
Jesús ma̠tzuqui̠y xli̠tascújut nac Galilea
(Mateo 4.12‑17; Lucas 4.14‑15)
14 Ni̠ xli̠maka̠s quilhtamacú Juan Bautista tamacnú̠calh nac pu̠la̠chi̠n, acxni̠ Jesús taspitpa̠ nac Galilea y antá tzúculh ca̠ma̠kalhchuhui̠ni̠y cristianos lácu Dios xca̠ma̠lacnu̠nima túnuj tla̠n latáma̠t.
15 Y chiné xca̠huaniy:
—Aya lakcha̠ni̠t quilhtamacú acxni̠ Dios nama̠tzuqui̠y xasa̠sti xtapéksi̠t nac ca̠quilhtamacú. Calakpalí̠tit xali̠xcájnit mintalacapa̠stacnicán y caca̠najlátit u̠má xasa̠sti xtama̠catzi̠ní̠n hua̠ntu̠ ma̠sta̠y laktáxtut.
Jesús ca̠huaniy catasta̠lánilh kalhata̠ti squi̠ti̠naní̠n
(Mateo 4.18‑22; Lucas 5.1‑11)
16 Maktum quilhtamacú acxni̠ Jesús xtla̠huama nac xquilhtú̠n xapupunú Galilea ca̠úcxilhli cha̠tiy squi̠ti̠naní̠n xtamaju̠má̠nalh xtza̠lhcán nac chúchut, cha̠tum huanicán Simón y xta̠lá huanicán Andrés.
17 Pero Jesús ca̠huánilh:
—Huixinín xchipananí̠n squi̠ti, quila̠sta̠laníhu y aquit nacca̠ma̠siyuniyá̠n la̠ ca̠chipacán cristianos ti̠ ta̠ktzanka̠ni̠t.
18 Xlacán tuncán tamákxtekli xtza̠lhcán y tasta̠lánilh.
19 Caj a̠ctzú tla̠huampá Jesús úcxilhli Santiago xkahuasa Zebedeo xa̠hua xta̠lá xuanicán Juan; xlacán xtataju̠má̠nalh nac aktum barco xtalacachi̠má̠nalh xtza̠lhcán.
20 Jesús na̠ ca̠huánilh catasta̠lánilh y xlacán taakxtékmi̠lh xtla̠tcán Zebedeo nac barco chu xmakta̠yananí̠n y tasta̠lánilh Jesús.
Cha̠tum chixcú ti̠ xmakatlajani̠t xespíritu akskahuiní
(Lucas 4.31‑37)
21 Tácha̠lh nac aktum ca̠chiquí̠n huanicán Capernaum y acxni̠ lákcha̠lh quilhtamacú acxni̠ hua̠k judíos xtajaxa, Jesús tánu̠lh nac xpu̠siculancán hua̠ntu̠ huanicán sinagoga y antá tzúculh ca̠ma̠kalhchuhui̠ni̠y lacchixcuhuí̠n.
22 Pu̠tum cacs xtalacahuán acxni̠ xtakaxmatniy hua̠ntu̠ xlá xli̠chuhui̠nama porque xlá la̠ta tu̠ xca̠li̠ma̠peksi̠y xca̠huaniy la̠ ti̠ xli̠ca̠na kalhi̠y li̠ma̠peksí̠n y ni̠ caj la̠ xma̠kalhtahuake̠nacán judíos.
23 Y acxnitiyá a̠má quilhtamacú na̠ antá tánu̠lh cha̠tum chixcú ti̠ xakchipanini̠t xtalacapa̠stacni akskahuiní xlá chiné quilhánilh:
24 —Huix Jesús xalac Nazaret, ¿túcu xpa̠lacata quila̠pektanu̠yá̠hu? Huix caj tani̠ta quila̠ma̠sputuyá̠hu, porque aquit clakapasá̠n y ccatzi̠y pi̠ huix hua̠nti̠ Dios lacsacni̠t la̠qui̠ nascujnaniya.
25 Pero Jesús lacaquílhni̠lh a̠má xespíritu akskahuiní y chiné huánilh:
—¡Cacs caquílhuanti y camákxtekti tamá chixcú!
26 Amá xespíritu akskahuiní ma̠snókni̠lh u̠n y li̠pe̠cua tásalh pero juerza mactáxtulh a̠má chixcú.
27 Putum hua̠nti̠ antá xtalayá̠nalh tapé̠cualh y chiné tzúculh tala̠kalhasquín:
—¿Lácu eé qui̠taxtuy? ¿Túcuya̠ sa̠sti tacatzí̠n? ¡Eé chixcú kalhi̠y li̠tlihueke tla̠n ca̠ma̠peksi̠y xespíritu akskahuiní y xlacán takalhakaxmata!
28 Pu̠tum lacchixcuhuí̠n xalac Galilea xtali̠chuhui̠nán la̠ta tu̠ xlá xtlahuay Jesús.
Jesús ma̠pacsay xpu̠tiya̠tzí Simón Pedro
(Mateo 8.14‑15; Lucas 4.38‑39)
29 Acxni̠ tatáxtulh nac pu̠siculan Jesús ca̠tá̠alh Santiago chu Juan nac xchic Simón chu Andrés.
30 Li̠ta̠chuhui̠náncalh Jesús pi̠ xpu̠tiya̠tzí Simón xta̠tatlay y xke̠tama nac xtícat porque xkalhi̠y palha lhcúya̠t.
31 Jesús laktalacatzúhui̠lh antaní xmá, macachípalh y lakasiyu má̠qui̠lh, acxnituncán mákxtekli lhcúya̠t. Amá pusca̠t tá̠qui̠lh y tzúculh ca̠xtlahuay para túcu naca̠ta̠huay.
Jesús ca̠ma̠pacsay lhu̠hua ta̠tatlaní̠n
(Mateo 8.16‑17; Lucas 4.40‑41)
32 Acxni̠ tzúculh tzi̠suán a̠má quilhtamacú li̠minícalh Jesús lhu̠hua ta̠tatlaní̠n, na̠chuná ti̠ xca̠akchipani̠t xtalacapa̠stacni xespíritu akskahuiní.
33 Y xli̠hua̠k cristianos hua̠nti̠ xtahuilá̠nalh nac a̠má ca̠chiquí̠n tatamacxtúmi̠lh hasta niaj lay xtatanu̠ko̠y xchic Simón.
34 Jesús ca̠ma̠tlá̠nti̠lh la̠ta túcuya̠ tajátat xtakalhi̠y, na̠chuná ti̠ xca̠mactanu̠ma xespíritu akskahuiní xlá ca̠tamácxtulh. Acxni̠ xca̠tlakaxtuy xlá ni̠ xca̠ma̠xqui̠y quilhtamacú natachuhui̠nán a̠má akskahuinaní̠n porque xlacán xtacatzi̠y tícuya̠ chixcú xuani̠t Jesús.
Jesús an ca̠lakatza̠lay lactzu ca̠chiquí̠n xla Galilea
(Lucas 4.42‑44)
35 Acxni̠ nia̠ cxkakako̠y a̠má tzi̠sní chunacú ca̠pucsua xuani̠t Jesús tá̠qui̠lh y alh kalhtahuakaniy Dios nac xquilhapá̠n a̠má ca̠chiquí̠n.
36 Acxni̠ talakáhua Simón Pedro chu xa̠makapitzi xtama̠kalhtahuaké̠n tzúculh taputzay.
37 Y acxni̠ taqui̠máclalh tahuánilh:
—Lhu̠hua cristianos taputzamá̠n.
38 Pero xlá ca̠kálhti̠lh:
—Chú naaná̠hu a̠lacatunu ca̠chiquí̠n ni̠ma̠ tlak lacatzú tahuilá̠nalh la̠qui̠ naca̠li̠ta̠chuhui̠naná̠hu cristianos lácu Dios lacasquín natalatama̠y porque caj huá xlacata quili̠macamini̠t Dios.
39 Pus Jesús chuná ca̠lakatzá̠lalh lactzu ca̠chiqui̠ní̠n hua̠ntu̠ xca̠ma̠peksi̠y Galilea. Acxni̠ xcha̠n nac aktum ca̠chiquí̠n xlá xtanu̠y nac xpu̠siculancán judíos la̠qui̠ antá naca̠li̠ma̠kalhchuhui̠ni̠y cristianos xtachuhuí̠n Dios y hua̠nti̠ xkalhi̠y xespíritu akskahuiní xca̠ma̠tla̠nti̠y.
Jesús ma̠pacsay cha̠tum chixcú ti̠ xkalhi̠y lepraj tajátat
(Mateo 8.1‑4; Lucas 5.12‑16)
40 Maktum quilhtamacú laktalacatzúhui̠lh Jesús cha̠tum chixcú ti̠ xkalhi̠y li̠pe̠cuánit tajátat huanicán lepra. Xlá lakatatzokóstalh y chiné huánilh:
—Aquit ccatzi̠y pi̠ huix tla̠n naquima̠pacsaya, para huix chuná lacasquina caquima̠pacsani eé quintajátat.
41 Jesús lakalhámalh, xamánilh nac xmacni y chiné huánilh:
—Chuná clacasquín, la̠nchú tuncán capacsti.
42 Acxni̠ chuná huaniko̠lh a̠má ta̠tatlá tuncán pacsli.
43 Jesús huánilh pi̠ caalh nac xchic, pero li̠ma̠péksi̠lh:
44 —Ni̠ti̠ cahuani lácu huix pacsni̠ta; caj xma̠n caputza cha̠tum cura la̠qui̠ naucxilhá̠n y cama̠xqui milimosna hua̠ntu̠ Moisés tili̠ma̠peksí̠nalh natama̠sta̠y acxni̠ tapacsa hua̠nti̠ xtakalhi̠y u̠má tajátat, la̠qui̠ acxni̠ xlá naucxilhá̠n nama̠luloka y chuná pu̠tum nacatzi̠ko̠cán pi̠ aya pacsni̠ta a̠má mintajátat hua̠ntu̠ xkalhi̠ya.
45 Pero a̠má chixcú cati̠huá tzúculh ca̠li̠ta̠chuhui̠nán hua̠ntu̠ xlá xtlahuani̠t Dios y lácu xma̠pacsani̠t. Pus caj huá xlacata Jesús niajlay xtanu̠ya̠chá nac aktum ca̠chiquí̠n antanícu lhu̠hua xtzamacán, pus huata caj xca̠macní̠n xtla̠huán antanícu ni̠ti̠ talayá̠nalh cristianos. Pero ma̠squi chuná, xtamín cani̠huá xalaní̠n xlacata natakaxmatniy xtachuhuí̠n.