GALA Sɛʋɛi 2 Samiyɛle 16

Davide ta Mefiɓaale ná-botiɠɛ nui Siɓa

1 Davide lago leʋeni nɔ gize unmaʋɛ ʋa, é Mefiɓaale ná-botiɠɛ nui Siɓa ɠa, é ʋaazu daaɠomisu ga soovale felegɔ ti maaɠiliai ta ti ɠasɔɠiliai ga ɓulu unfelegɔ (200), ta leezɛn vɔɔ ɓuun ungila (100), naa ʋɛɛ gulu waa ungila (100) kili ba, ta kɔlɔ woole ɠila dɔɔi zu. 2 Masagi gaazaɠani, é ɠɛ ma: «Lee ɠa è pɔ è kɛ ga nii pɛ?» Siɓa gooɠaaʋoteni, é ɠɛ ma: «Soovalegiti ta ga masagi ná-pɛlɛyeɠei nɔnɔ, ti ɗa zei ti ɠɔma, ɓului ta gulu waaiti ti ɠɛ ga ɠɔnɔgi buzeɠe niinɛgiti bɛ, dɔɔi ɠɛ ga kpɔɔle ɗɛi naati bɛ, ta ɓɔlɔ teʋebai zu.» 3 Masagi ɠɛni ma ʋolu: «Mini ɠa mu ɗa-ɠalamɔin ná-doun zunui ná?» Siɓa masagi wooɠaaʋoteni, é ɠɛ ma: «Zɛgɛ Zeeluzalɛme, mazɔlɔɔ é ɠɛa ɠɛɛzu ɓɔɠɔ ma: ‹Izelayɛle ʋɛlɛyeɠei ɠa kɛ̀ɛ ná-masadai ve zèa niina.› » 4 Masagi ɠɛni Siɓa ma naazu: «Ni zekana é la, nii pɛ é ga Mefiɓaale nɔnɔ, gè ti pɛ fea è ya.» Siɓa ɠɛni ma: «Nà nɔkɔsu è ɠɔɠɔwu. Ɗa-vaaɓɔɠɔi zoo é yɛ bà, màliɠii.»

Simeyi Davide voovoo vai

5 Masagi Davide zeeliai ma Ɓaɠulime, zunui ta ɠulani taa goi naa zu, é ga Sayile ná-pɛlɛyeɠei wu nui ta. Zunui naa laaseigi ɠɛni ga Simeyi, é ga Geela ná-doun zunui. É ɠɛni ʋaazu ga Davide voovoa, 6 é ɗa kɔtuiti pili Davide ta ná-botiɠɛ nuiti ma, anɛɛ ni nuɓusɛiti ta salaʋusuiti ti ɠakuni naa ma, kɔʋɛzu ʋelei ta zeezazu ʋelei. 7 Simeyi ɠɛni wooɠulazu, é ɗa Davide voovo, é ɗa ɠɛ ma: «Leʋe, leʋe, nu ʋaa nui, nu ɲakai! 8 Ɠɔoɠɔ GALAGI Sayile ná-pɛlɛyeɠei ma ɲamai laa è unma, Sayile nii è masadai ɠɛɛzu potogi zu. Ɠɔoɠɔ GALAGI masadai ɠula è ya, é fe è-loin Aɓesalɔme ya. Wɛlɛ ɗa ʋa za, è maawɔinɗai, eɠɛʋelei soloogai la è ma, mazɔlɔɔ ɗa ga nu ʋaa nui.»

9 Názu ɠa Seluya ná-doun zunui Aɓisayi ɠɛni la masagi ma: «Lee vaa zu nu ɠa gilɛ ʋoomai nii yɛ ná, é ɗa màliɠii masagi voovo? Va bu gè li, gè nɔungi leʋe ba.» 10 Masagi gooɠaaʋoteni, é ɠɛ ma: «Wɔnɔi ɠa naa zu ga leeni, Seluya ná-doun zunuiti? Mazɔlɔɔ ni Ɠɔoɠɔ GALAGI ɠa kɛai ma é fòovo, ɓɛ ɠa a zelilo ma?» 11 Naa ʋoluma Davide ɠɛni Aɓisayi ta ná-botiɠɛ nuiti pɛ ma: «Ni dòun zunui nii gè sɔlɔɔgai nà ɓɔɠɔi, naa ɠa ɠɛɛzu é pàa, Ɓɛnzamɛn nui nii la kɛa, é ʋa leʋe naa ʋa ɓaa? À zɛ ná dɔin, é foovooi loo, mazɔlɔɔ Ɠɔoɠɔ GALAGI ɠa é boga ma. 12 Tanisu Ɠɔoɠɔ GALAGI ɠa nà-maanɔɠɔi ʋɛtɛsu, é za voovooi lati ga tuyai.»

13 Davide ta ná-nuiti ti ɠɛni liizu nɔ, Simeyi ɓalaa ɠɛni ziɛzu Davide ɠobaʋɛ gize ɠakamaʋɛ, é ɗa foovooi loo, ta é ɗa kɔtui ta fufiligiti pili. 14 Gaaɓelagi, masagi ta polu nuiti ti zeelini, ti wola ɓɔlɔai. Miná ɠa ti looɠoni ná.

Aɓesalɔme zeeli vai Zeeluzalɛme

15 Aɓesalɔme ta Izelayɛle nuɓusɛiti pɛ ti lɛɛni Zeeluzalɛme, Ayitɔfɛle ɠɛni ba. 16 Siɛgi zu Davide bɔɔlai Aaleke nui Ɠusayi zeelini la Aɓesalɔme ɠobaʋɛ, é ɠɛni ma: «Masagi lɛbi ɠeke, é lɛbi ɠeke faan!» 17 Aɓesalɔme ɠɛni Ɠusayi ma: «Ɗa-wooɠɛɠiladai pɛ kana, é ʋilɛ è-wɔɔlai ʋa? Toɠa ɠale, è la ʋilɛni polu?» 18 Ɠusayi gooɠaaʋoteni, é ɠɛ ma: «Ɓa, nui nii Ɠɔoɠɔ GALAGI ta nuɓusɛi niiti, naa ʋɛɛ kɔɔɠɔ nuiti pɛ ba, ti yiimazeɠeai la, naa ɠa gè ʋilɛsu polu, gè yɛ koba. 19 Tɔun vɔlɔ, nui ma zii pɛ tɛi nà ɗa botii ɠɛ bɛ. Bɔ̀ɔlai ná-doun zunui la ga ɗe ɓaa? Ʋelei nɔ gè ɠɛa la ga è-ɠɛɛ ná-botiɠɛ nui, zenɔ ɠana gè botii ɠɛɛzu la è ʋɛ.»

20 Aɓesalɔme ɠɛni Ayitɔfɛle ma: «À ɗa tɛnɛgi wo ʋɔɔma. Ada kɛ ɠale?» 21 Ayitɔfɛle gooɠaaʋoteni, é ɠɛ ma: «Li, è la ga è-ɠɛɛ anzaiti, niiti ti la vuluni ga zɔiti kɛʋele, é ti yɛgai masa pɛlɛi wu, ga ti ɗa makɛ. Izelayɛle pɛ ka kwɛɛ naazu ga è lɛɠɛa è-ɠɛɛ zu, naazu niiti pɛ ti è ʋolu, ta zɛbɛ zɔlɔɔ.» 22 Ti seɠe ɠotai loni Aɓesalɔme ʋɛ, dooɠo bosuʋɛ ná ɓɛtɛai pɛlɛi maazu, miná ɠa é laani ná ga kɛɛɠɛ anzaiti, niiti ti la vuluni ga zɔiti kɛʋele, Izelayɛle nuiti pɛ gaazu.

23 Naama ziɛgi zu kuɲɛ ɠɛni Ayitɔfɛle ná-tɛnɛ gooiti pɛ ba, eɠɛ nu ɠa GALA ɓɔɠɔi ɠaazaɠa, zekana ná-tɛnɛ gooiti pɛ ti ɠɛni la Davide ʋɛ ta Aɓesalɔme ɓalaa bɛ.