15
Kwób Bazenórr Zerrusalem Wirri Basirrdü
Ngibürr pama togobórr Zudia prrobinsdügab ama Antiok wirri basirrdü, da Yesun amkoman angun zonaretala umulbain we bókyenóp. Wagó, “E koke zid bainane, ngarkwat kókó yabü ⌊gyabi sopae singgalgórre⌋ Mosesón gida-azan bóktanda.”+ Pol a Barrnabas inkü karibóka-koke darrem-darrem bóka bamgürri ene umulbainankwata. Da Yesun amkoman angun pamkolpama nüpüdóp Pol a Barrnabas akó ngibürr ibükagab tótókóm Zerrusalem, ⌊apostol⌋ akó sos alngomól byarrmarr pam basenóm inikwata.
Da sos pamkolpama Antioküm ibü we zirrnapónóp. I Ponisia akó Samarria prrobinsdüma ogoblórr, büzazilkü, Zu-koke nidi kwarilürr, i ia tübyalüngóp Godka. Ini bóktana kari morroal bagürwóm koke sidódürr blaman Yesun amkoman angun zonaretaldó. I Zerrusalem nóma babzilürr, ibü sos pamkolpam, apostol, akó sos alngomól byarrmarr pama morroal yazebóp, nibiób nüzazilóp blaman kla God ne kla tómbapónórr ibükama. Da ngibürr Yesun amkoman angun pamkolpam, Parrisipükü nidi kwarilürr, bórrangórr da bóktónóp wagó, “Mi Zu-koke nidipko ibü wata nüzazilórre ibü gyabi sopae singgalgónóm akó Mosesón ngibürr gida mamoanóm.”
Apostol akó sos alngomól byarrmarr pama darrpan pokodó togobórr ini amtin bóktan tai ngakanóm. Wirri ngarkwat ipadórr ini bóktana, da ene solkwat Pita zamngólórr da bóktanórr wagó, “Kürü zonaretal, e umulakla igó, ngaen God kürü wató krruanórr yabükagab oya ⌊Morroal Bóktan⌋ büdrratóm ibüka, Zu-koke nidipko, ibü arrkrrum akó amkoman angunüm oya.+ God, umul nótóka mibü blaman darrpan-darrpanab moboküp, tóba ubi bain okaka simzazilürr mibüka, Zu-koke nidipko, ibü tótókóm tóbaka, da ibü igósidi nókyenóp Godón Samu, mibüzan tókyenóp.+ Wa mibü Zu pamkolpam akó Zu-koke nidipko darrpan ngarkwatódó ngabkan yarilürr: wa mibü kolae tonarrzan norrgonóp, wa ta akó ibü kolae tonarr inzan norrgonóp, zitülkus i amkoman yangunóp. 10 Da ene pokodó, e Godón iade apókdakla, wirri müp Yesun umulbain olmaldó arrbündi? Mibü abalbobatal gaodó koke kwarilürr inzan müp bamselóm, akó mi ta inzan gaodó koke kwarilnürrü! 11 Koke! Lod Yesu mibü tóbanóm ⌊gail tonarrezan⌋ zid tinóp, mi enezan amkoman angundakla, wa ta darrpan tonarre zid ninóp Zu-koke nidipko.”
12 Blaman kolpam piküp kwarilürr ene pokodó, i enezan arrkrru kwarilürr, Barrnabas a Pol ne ⌊arüng tonarr⌋ akó ⌊asen-koke tórrmen⌋ müsirrga bainürri, God ibükama ne kla tómbapólórr ibüka, Zu-koke nidipko. 13 Ibü bóktana nóma blakónórr, akó Zeims* bóktanórr wagó, “Zonaretal, kürü kurrkrruam! 14 Saemon kuri müsirrga ine, Godón ngaen ne gyaur yarilürr ibüka, Zu-koke nidipko, da God ibü aodógab pamkolpam yusürr tóbaka tótókóm. 15 Prropeta darrpan ngarkwatódó bóktan kwarilürr ini klamdó. Godón Wialómórrón Bóktana enezan bóktanda wagó,
16 “ ‘Lod bóktanórr wagó, “Ini solkwat ka sab tolkomolo,
akó ⌊Deibidün⌋ palae müót sab akó elo.
Ka sab ene bülgatórrón müót akó elo
akó tóba gaodó yalkomolo.
17 Ene igósüm dómdóm bamirrün pamkolpama sab kürü kyamkünórre,
akó blaman pamkolpam, Zu-koke nidipko, kürü ngi nidi ⌊ótókdako⌋, sab kürü kólba korale.
18 Lod inzan bóktanda, ini kla nótó tómbapónda, ngaendógab umulürrün ne klako.” ’ ”+
19 Zeims akó bóktanórr wagó, “Ini kürü gyagüpitótóke igó, mi ibü, Zu-koke nidipko, müpdü koke barrmuno, nidi byalüngdako Godka. 20 A mi darrü peba mórrag wialómórre ibü byalóm wagó, ‘E darrü tómanpükü alóng kla alónggu, ne kla simarrurre obae godódó, akó e ngibürr kolpampükü utgu, yabü kol ó morwal koke nidipko. E óepükü alóng kla murr alónggu lardógab, pamkolpama ne kla ekrrórre ibü gepko amóngde, akó e óe anón-gu.’+ 21 Mosesón Gida blaman ⌊Sabad⌋ metat wata atangdako kwóbbazen müótüdü, ngaendógab kókó errkya, akó oya bóktan amgoldako blaman basirr-basirr.”
Peba Mórrag Zirrapónóp, Yesun Amkoman Angun Pamkolpamdó, Zu-koke Nidi Kwarilürr
22 Da apostol, sos alngomól byarrmarr pam, akó blaman sos pamkolpama gyagüpitótók esenóp pam nis apadóm tibióbkagab, zirrapónóm Antiok tótókóm, Pol akó Barrnabas usakü. I ini pam nis nüpüdóp: Zudas, i inzan ngilianónóp wa Barrsabas, akó Saelas, nidi namülnürri Yesun amkoman angun zonaretalab balngomól pam nis. 23 Da peba mórrag idi idódrri. Ene peba mórrag inzan wialómórrón yarilürr wagó,
“Ki, apostol akó sos alngomól byarrmarr pam, yabü Yesun amkoman angun zonaretal, morroal ngürr bóktan zirrapóndakla yabüka, Yesun amkoman angun pamkolpam, Zu-koke nidipko, Antiok wirri basirrdü, Sirria prrobinsdü, akó Silisia prrobinsdü. 24 Ki igó kuri barrkrrua, ngibürr pama kibükagab ogobórr yabüka ola, da yabü müp akó kolae gyagüpitótók nülinóp, i ne poko bóktónóp yabüka. A ibü kidi koke nilóp inzan bóktanóm. 25 Da ki blamana ubi bairre nis pam nis apadóm akó zirrapónóm yabüka, usakü tótókóm, kibü moboküpdü gódam nis, Barrnabas a Pol, 26 gum-koke nidi namülnürri büdülüm tibiób arról akyanóm Lod Yesu Kerrison ngidü. 27 Da módóga, ki Zudas akó Saelas ibü zirrapóndakla taeane müsirrga ainüm dadan bóktan, ki ne bóktan wialómdakla ini peba mórragdó. 28 Zitülkus módóga, Godón Samu akó kidi kuri ubi bairre yabü ngibürr müp alión-gum, ini wirri gida bóktan pokodógab wagó, 29 e darrü alóng kla alónggu, ⌊urdü agasil larzan⌋ ne kla simarrurre obae godódó; e óepükü alóng kla murr alónggu lardógab, pamkolpama ne kla ekrrórre ibü gepko amóngde; e óe anón-gu; akó e ngibürr kolpampükü utgu, yabü kol ó morwal koke nidipko. E ne sab ini kolae elklazadógabi nóma kórzinane, e morroal tómbapónane. Yawal, e tai ngyabelamke.”
30 Da i ene pam we zirrnapónóp Antiok. I blaman sos pamkolpam ngibaunóp darrpan pokodó kwób bazenóm, da peba mórrag we nókyenóp. 31 Ene pamkolpama nóma etóngóp wirrianbóka ene peba mórrag, i bagürwómüm bainóp, ibü ne morroal arüng bütan bóktan nókyenóp. 32 Zudas akó Saelas, tib prropet nis, usakü barrkyan ngarkwat ipüdóp bóktanóm, ibü moboküp karrkukus ainüm akó ibü arüng bütanóm. 33 Ngibürr ngürr kakóm, Yesun amkoman angun zonaretala ibü we zirrnapónóp morroal paud moboküpi. Da i we alkomórri ibüka, ibü nidi zirrnapónóp.
35 Pol, Barrnabas, akó abün pamkolpama Antioküm we bürrmütóp, Lodón bóktan umul bainüm akó büdrratóm.
Pol a Barrnabas Bürrgrratürri
36 Ngibürr tonarr kakóm, Pol bóktanórr Barrnabaska wagó, “Mi kya kóbó alkomóli Yesun amkoman angun zonaretal bangónóm, mi ngaen ne basirrdüma aurrnürri Godón bóktan büdrratkü, akó asenóm i errkya ola ia taiasko.” 37 Barrnabasón ubi Zonón apadóm yarilürr inkü tótókóm, oya darrü ngi Mak,+ 38 da Polka dümdüm koke yarilürr, zitülkus Mak zaget morroal koke elakónórr inkü. Wa kwat-kwatgab alkomólórr akó ibü ma Pampiliam nümgatórr.+ 39 Da ibü kari ongyal koke yarilürr, da i igósidi we bürrgrratürri. Barrnabas Makón ipadórr, da i nyórrpükü buti we aurrürri ama Saeprrus kaodó,§ 40 a Pol ma Saelasón ipadórr, da i we bupadürri. Yesun amkoman angun zonaretala ibü Lodón tangdó nüngrinóp tóba gail tonarrdógab alngomólóm, 41 da i we aurrnürri Sirria akó Silisia prrobinsdüma, sos pamkolpam arüng bütankü.
+ 15:1 Lebitikus 12:3 + 15:7 Apostolab Tórrmen 10:1-43 + 15:8 Apostolab Tórrmen 2:4; 10:44 * 15:13 Zeims Yesun darrü zoret yarilürr akó Zerrusalem sosan alngomól pam (Galatia 1:19). 15:16 Deibidün palae müót alap-alap bóktan opora: tóba kingzan balngomólbóka apónda. + 15:18 Eimos 9:11-12 + 15:20 Bazeb Tonarr 34:15-17; Lebitikus 17:10-16; 18:6-23 15:33 Ngibürr Grrik bóktane tange wibalómórrón pebadó, atang poko 34 asine. Igó bóktanda wagó, “A Saelas tóba gyagüpitótók yalüngürr Zerrusalem alkomólóm, da wa Antioküm we burrmatórr.” + 15:37 Apostolab Tórrmen 12:12, 25; 13:13; Kolosi 4:10; Pilimon 1:24 + 15:38 Apostolab Tórrmen 13:13 § 15:39 Saeprrus Barrnabasón amtómól bwób yarilürr.