23
1 Pol dümdüman yazilürr Zu ⌊balngomól byarrmarr pamdó⌋ akó bóktanórr wagó, “Kürü Zu zonaretal! Ka kólba igó küp bamkóndóla, ka morroal zaget tónggapónórró Godón obzek kwata, kókóta errkya ini ngürr.”
2 Da singüldü prrist Ananias arüng bóktan nókyenóp ene ne pama bórranglórr Polón minggüpanan, tae kwata amkalóm.
3 Pol oyaka inzan bóktanórr wagó, “Marü ta kubó God mómkóle - ma gabülpli angangorrón grila! Ma we mórrandóla kürü zaz ainüm gida ngarkwatódó, da ma ma gida alkamüla ibü arüng bóktan aliónüm kürü amkalóm!”
4 Polón minggüpanan ne pama bórrangórrón koralórr, inzan ilóp wagó, “Ei? Ma singüldü prrist kle-kle ayaldóla!”
5 Pol bóktan yalkomólórr wagó, “Kürü Zu zonaretal, ka umul-kók namüla igó, wa singüldü prrista. Zitülkus módóga, Godón Wialómórrón Bóktana igó bóktanda wagó, ‘E kolae bóktan koke bóktónane yabiób singüldü pamabkwata.’ ”
6 Pol nóma yazilürr igó, ngibürr ene kolpam ngorodó ⌊Sadusi pam⌋ koralórr akó ngibürr ma Parrisi kwarilürr, wa Zu balngomól byarrmarr pamab kwób bazen pokodó wirri gyagüpi bóktanórr wagó, “Kürü Zu zonaretal! Ka Parrisila, Parrisiab siman olomla. Ka kotódómla errkya aini, zitülkus ka ⌊gedlóngóm baindóla⌋, sab büdüla tübarsine!”
7 Wa ini poko nóma bóktanórr, Parrisi akó Sadusi pama ongyalóm bainóp, da ene kwób bazenan myamem darrpan gyagüpitótók koke yarilürr.
8 (Zitülkus módóga, Sadusi pama igó bóktandako wagó, kolpama sab koke tübarsine büdüldügab akó wa, anerru akó samu babulako; Parrisia ma blaman amkoman bangundako.)
9 Ene taegwarra tai wirri bainürr, akó ngibürr gida umulbain pam, Parrisi nidi koralórr, bórrangórr akó wirri arüngi bóktan kwarilürr wagó, “Ki darrü kolae koke kuri eserre ini pamdó! Aprrapórr darrü samu ó anerrua amkoman oyaka bóktanórr!”
10 Ene ongyala ma tai inzande wirri bailürr, gazirr singüldü wirri ngi pam guma igósidi ipadórr wa, Polón kubó kari syórr kena yangónónóm. Da wa tóba gazirr pam we nilóp ene ngorodó tótókóm, Polón apadóm ibükagab, akó tibiób ngyaben müótüdü ódódóm.
11 Ene irrüb, Lod Polón minggüpanan zamngólórr da bóktanórr wagó, “Ma gumgu; arüng ipa! Ma kürükwatazan bóktóna aini Zerrusalem wirri basirrdü, ma akó dadan bóktan amgolke Rromóm.”
Zu Pama Bóktan Tónggapóndako Polón Büdülümpükü Amkalóm
12 Darrü irrbi, ngibürr Zu pama darrpan pokodó togobórr bóktan angrinüm piküpan. I ⌊arüng alkamül-koke bóktan⌋ ingrinóp wa, i sab darrü kla kokean elorre ó enórre ngarkwat kókó i Polón emkórre.
13 Darrpan pokodó ini bóktan angrinüm, blaman kókó 40 ama kwit ngarkwat pam kwarilürr.
14 Da i blamana ogobórr wirri prristdü akó Zu pamkolpam ngabkan byarrmarr pamdó, da bóktónóp wagó, “Ki wirri arüng alkamül-koke bóktan kuri ingrirre wagó, ki sab darrü kla kokean elorre, ngarkwat kókó ki Polón sab emkórre.
15 Da errkya, yadi akó Zu balngomól byarrmarr pam, bóktan zirrapónam gazirr singüldü wirri ngi pamdó Polón abinüm yabióbka. E obae tiz agósamke igó, yabü ubi igósüma Polkagab dümdüm póep azebóm. Wa yabü amrran küsil nóma yarile, ki ma kib zangórrón kwarilo barrón, oya amkalóm kwat-kwat.”
16 Polón nungzamón siman oloma ma oya ene amkal bóktan arrkrrurr; da we wamórr gazirr pamab müótüdü akó Polón we izazilürr.
17 Pol darrü gazirr pamab kopo ngakan wirri pam ngyaunürr akó oyaka bóktanórr wagó, “Ini küsil pam gazirr singüldü wirri ngi pamdó idó; oya darrü bóktana oya azazilüm.”
18 Gazirr wirri pama oya ipadórr, elngomólórr gazirr singüldü wirri ngi pamdó, akó bóktanórr wagó, “Ene tümün müótüdü pam, Pol, kürü ngikaune akó kürü kümtine ini küsil pam marüka ódódóm, zitülkus oya darrü wirri bóktana marüka adrratóm.”
19 Gazirr singüldü wirri ngi pama oya tangdó emoanórr, tebe-tebe pokodó idódürr amtinüm wagó, “Marü ia laró bóktana kürü azazilüm?”
20 Wa bóktanórr wagó, “Zu pamkolpama kuri babine marü amtinüm sab Polón abinüm Zu balngomól byarrmarr pamab kwób bazen pokodó, obae tiz agósóm wa, ibü ubia dümdüm póep azebóm oyakagab.
21 Da ma ibü arrkrrugu, zitülkus i blaman kókó 40 ama kwit ngarkwat pamako. I sab barrón kwarile oya akyanóm. I wirri arüng alkamül-koke bóktan kuri ingrirre alo bütóküm ó nae anón-gum, kókó i oya emkórre. I zangórrónako tórrmendó angrinüm, da ma marü bóktan akyandako.”
22 Gazirr singüldü wirri ngi pama bóktanórr wagó, “Ma darrü pam ta azazilgu igó, ini bóktan kürüka mató pupaina.” Akó wa ene küsil pam we zirrapónórr.
Polón Gabena Pilikska Zirrapónóp
23 Gazirr singüldü wirri ngi pama tóba nis gazirr pamab kopo ngakan wirri pam nis nginaunürr akó bóktanórr ibüka wagó, “E 200 gazirr pam, 70 ⌊os⌋ kwitüdü mórran gazirr pam, akó 200 kyabe gazirr pam yazeb ibü elklaza tólbaelóm Sesarria wirri basirrdü tótókóm. E zangórrón koralón ini irrüb 9 abüs küp ngarkwat bazebóm.
24 Polón ngibürr os ilinamke oya morroal ódódóm kókó gabena Piliks-ka.”
25 Da gazirr singüldü wirri ngi pama darrü peba mórrag inzan wialómórr:
26 “Ka, Klodius Lisias, ini peba mórrag wialómdóla marüka, Wirri Ngi Pam, Gabena Piliks. Marüka morroal ngürr.
27 Zu pama ini pam amigóp, akó i oya amkalóm angónóm kain koralórr. Ka arrkrrurrü igó, wa Rrom bwób pama, da ka wamórró kólba gazirr pampükü oya zid ainüm ibü tangdógab.
28 Kürü ubi umul bainüm yarilürr, i oya laró kolae zitülkusdü amigóp kotódó zamngólóm, da ka oya we sabirrü ódódóm Zu balngomól byarrmarr pamab kwób bazen pokodó.
29 Ka igó umul bairrü, oya kotóm amióg bóktan wa tibiób Zu isab gidankwata yarilürr; Rrom gida ngarkwatódó wa darrü kolae kokean tónggapónórr, a wa ma büdül kórsananbókamóm ki esene, akó tümün müótüdü ki ingrirre.
30 Akó kürü nóma küzazilóp wagó, oyakwata bóktan angrindako oya büdülümpükü amkalóm, büzyón-babul, ka oya marüka zirrapórró. Oya nidi kotóm aindako, ka ibü nilarre tibiób amióg bóktan oyakwata marü obzek kwata arrbünüm.”
31 Gazirr pama tibiób arüng bóktan mamunóp. I Polón ipüdóp akó ene irrüb sidüdóp tai kókó Antipatrris wirri basirrdü.
32 Darrü ngürr wapórane tótók gazirr pama bakonórr tibiób ngyaben müót basirrdü Zerrusalem, akó os kwitüdü mórran gazirr pam we bimgütóp Polkü tótókóm.
33 I oya Sesarria wirri basirrdü idüdóp, gabenan peba mórrag we ekyenóp, akó Polón oya tangdó we ingrinóp.
34 Gabena peba mórrag we etangórr, akó Polón imtinürr wa nadü prrobinsdügab yarilürr. Wa nóma arrkrrurr igó wa Silisiagabia,
35 wa bóktanórr wagó, “Marü nidi kotóm aindako, sab nóma tübabzile, ka marü bóktan ugón arrkrruo.” Da wa arüng bóktan nókyenóp, Polón busogum oya tai ngakanóm Errodón wirri müótüdü, gabena ne ngyabelórr.