24
Ngi Pama Polón Kotóm Ain Bóktan Adrrütóp Pilikska
1 5 Ngürr kakóm, singüldü prrist ngi Ananias, Sesarria wirri basirrdü wamórr ngibürr Zu pamkolpamab ⌊balngomól byarrmarr pampükü⌋, akó darrpan gida umul pampükü, ngi Tetulus, da i tibiób bóktan imarruóp Polón tulmilabkwata gabenadó, ngi Piliks.
2 Polón nóma ngyaunóp, Tetulus tibiób bóktan Polónkwata we bóktanórr Piliksün obzek kwata wagó,
“Morroal wirri ngi pam Piliks! Ki wirri kokrrap morroal paudi kuri ngyaben koralnórró marü tangdó, akó marü morroal ⌊wirri gyagüpitótóka⌋ kuri simarrue küsil ngyaben tonarr ini bwóbdü.
3 Ki blamana bwób-bwób ini kla marü tangdógab morroal barnginwómpükü yazebóp!
4 A kürü bóktana marü wirri kokrrap koke ki müdó arrkrrum, da ka marü matoa, marü morroal tonarr gaodó ki yarilün kibü ini tugupurr bóktan arrkrrum.
5 Ki ini pam kuri eserre wagó, wa trrez bagós pama; gazirr wató ngangólda Zu pamkolpamdó blaman ini dudu tüpdü. Wa tüób Nazarrin pamkolpamab singüldü pama,
6 akó wa ⌊Godón Gyabi Müót⌋ tómanan ngitanóm kainürr. Da ki oya igósidi amigóp.
8 Ma tai oya nóma imtino müób asenóm, wa tai ne kolae tónggapónórr, ma kubó müób amkoman poko eseno ini blaman bóktan, ki ne kla simarrurre oya kolae tulmilabkwata.”
9 Zu pamkolpama barümóp Polón kotóm ain bóktandó wagó, ini amkoman bóktana.
Pol Tóba Bódlangórr Piliksün Obzek Kwata
10 Gabena nóma yalórr oya bóktanóm, Pol bóktan yalkomólórr wagó,
“Ka umulóla, ma abün pail kuri amóna pamkolpam zaz bainüm ini bwóbdü, da ka kólba barnginwómpükü igósidi bódlangdóla.
11 Ma kubó popadan umul baino wagó, 12 ngürra koke kuri bobrrone, ka Zerrusalem wirri basirrdü nóma wamórró Godón ⌊ótókóm⌋.
12 Kürü amióg pama koke kósenóp kürü ongyalde darrü olompükü Godón Gyabi Müótüdü, ó gazirr ngangólde pamkolpamab ngorodó, ⌊Zu pamkolpamab kwóbbazen müótüdü⌋, ó popa darrü pokodó Zerrusalem wirri basirrdü.
13 Akó i gaodó kokeako tibiób bóktanan küp okaka azazinüm, i errkyadan ne bóktan simarrurre kürükwata.
14 A ka yabüka panzeana bóktandóla, ka ótókdóla mibü abalbobatala ne God ótók koralórr Kwat mamoan pamzan, i nibióbbóka apóndako wagó, i obae bangun pamkolpamako. A dakla, ka ta amkoman angundóla blaman kla Mosesón gida ngarkwatódó, akó ne kla wibalómórrónko Prropetab Pebadó.
15 Ini amióg pamazan ⌊gedlóngóm baindako⌋ wa, sab büdüla tübarsine, dümdüm pamkolpam akó dümdüm-koke pamkolpam, ka ta we pokom gedlóngóm baindóla.
16 We ngarkwatódó, ka blaman tonarr igósidi kaindóla kólba moboküp ⌊kolkal⌋ ainüm Godón obzek kwata, akó blaman pamkolpamdó.
17 “Ka dokyanan pailüm ngibürr bwóbdü ngyabenórró; ene kakóm, ka Zerrusalem wamórró mani amarrum kólba elklaza-koke pamkolpamdó, akó Godón ⌊gyaur kla⌋ amselóm urdü, oya morroal ainüm.
18 Ka go wata Godón gidadógab morroal ⌊kolkal⌋ namülnürrü, i kürü nóma kósenóp ini kla tónggapónde Godón Gyabi Müótan kal akólórrón pul basirrdü. Ola pamkolpamab ngoro babul yarilürr kankü, akó ka koke barümürrü darrü gazirrdü.
19 A ola ngibürr Zu pamkolpam asi koralórr Eisia prrobinsdügab, nidi ki kwarile aini marü obzek kwata, akó amióg bóktan amarrum, ibü darrü kla ne nóma yarile kürükwata.
20 A i kokezan togobe, ini nidipko aini ki bóktónónóm, i kürüka laró kolae esenóp, ka nóma zamngórró blaman Zu balngomól byarrmarr pamab obzek kwata.
21 A wata ini darrpan kla, ka igó taegwarr apórró ka enezan zamngórró ibü obzek kwata kagó, ‘Büdüldügab arsümülbóka, ene ka we pokodó zamngóldóla yabü obzek kwata ini ngürr!’ ”
22 A Piliks, nótó yarilürr wirri umul Kwatbóka, kwóbbazen we piküp yónürr. Wa bóktanórr wagó, “Gazirr singüldü wirri ngi pam Lisias sab nóma tame, marü amióg bóktan ka sab ugón dümdüm ino.”
23 Wa gazirr pamab kopo ngakan wirri pam arüng bóktan ekyanórr Polón ngakanóm tümün müótüdü, a oya tai yarilürr agólóm tümün müót kugupidü, akó oya gómdamalab ta tai yarilürr oya tangamtinüm elklaza-e.
Pol Zamngólórr, Piliks akó Drrusila, Ibü Obzek Kwata
24 Ngibürr ngürr kakóm, Piliks tóba kolpükü abzilürr, ngi Drrusila. Wa Zu kol warilürr. Piliks bóktan zirrapónórr Polón tótókóm, oya bóktan arrkrrum Kerriso Yesun amkoman angunankwata.
25 A Pol enezan ikik yarilürr dümdüm ngyabenankwata, pama tóba tüób ia balngomól yarile kolae tómbapón-gum, akó ne Godón Kot Ngürra tótókda, Piliksün guma ipadórr, da bóktanórr wagó, “Ma kya alkomól! Ka nóma eseno morroal ngürr, ka akó sab marü ngimauno.”
26 A dakla ma wa igó gyagüpi wamlórr wagó, Pol oya saul ain mani ki ekyene oya popa zirrapónóm, da wa igósidi blaman darrpan-darrpan tonarr bóktan zirrbapón yarilürr Polka, tóbaka tótókóm, ikiküm.
27 Nis paila nóma blakórri, Piliksün pabo Porrsius Pestus ugón ipadórr, a zitülkus Piliksün ubi Zu pamkolpam bagürwóman ngibtanóm yarilürr, wa Polón tümün müótüdü amgatórr.