7
Ol i kilim Haman i dai
1 Orait na king tupela Haman i go kaikai wantaim Esta
2 namba 2 taim. Ol i dring wain i stap na king i askim Esta, “Orait Kwin Esta, yu laikim wanem samting? Yu tokaut na bai mi givim long yu. Sapos yu laik, mi inap givim yu hap kantri bilong mi.”
3 Na Kwin Esta i bekim tok olsem, “King, sapos yu laik mekim gut long mi, yu ken tok orait long askim bilong mi. Mi no laik bai mi wantaim ol manmeri bilong mi i mas i dai.
4 Ol i pasim tok pinis long mekim mipela i kamap ol wokboi na wokmeri nating bilong ol arapela man, na tu ol i laik kilim mipela i dai. Dispela hevi ol i givim long ol pikinini bilong mipela tu. Pastaim mi no laik tokaut long dispela hevi, na mi pasim maus i stap. Tasol mi lukim dispela birua bilong mipela i holim wok insait long haus bilong king yet, na mi ting em i no stret.”
5 King Serksis i harim dispela tok na em i askim Kwin Esta olsem, “Wanem man nogut i no pret long mekim ol dispela pasin?”
6 Na Esta i bekim tok, “Em dispela man Haman tasol. Em i birua bilong mipela.”
Haman i harim dispela tok na em i pret na i guria nogut tru.
7 Na king i belhat tru. Em i lusim kaikai na i go ausait long gaden i stap nabaut long haus bilong em. Haman i save pinis, king i laik bagarapim em nau. Em i laik askim Kwin Esta long marimari long em na i no ken larim king i bagarapim em, olsem na em i stap insait long haus.
8 Orait king i lusim gaden gen na i kam bek long rum kaikai, na em i lukim Haman i pundaun i stap long dispela bet Esta i sindaun kaikai i stap long en. Tasol king i lukim em na i singaut olsem, “E, ating dispela man i laik goapim meri bilong mi long ai bilong mi yet long haus bilong mi yet.” Haman i harim dispela tok na ol bun bilong en i wara olgeta.
9 Na wanpela wokman, nem bilong em Bugatan, i tok olsem, “Klostu long haus bilong em, Haman yet i bin sanapim wanpela pos, longpela bilong en inap long 20 mita. Em i laik hangamapim Mordekai long en. Em dispela Mordekai yet i bin helpim yu, na ol birua i no bin kilim yu i dai.”
Orait king i tok, “Yupela kisim Haman i go na hangamapim em yet long dispela pos.”
10 Olsem na ol i hangamapim Haman long dispela pos em i bin sanapim bilong hangamapim Mordekai long en. Ol i mekim pinis, na bel bilong king i kol gen.